Revòuta de Cronstadt

La Revòuta de Cronstadt es una insureccion antibolchevica que se debanèt dau 28 de febrier au 18 de març de 1921 durant lo periòde finau de la Guèrra Civila Russa. Marquèt l'apogèu de la crisi economica e politica que viviá lo país a la fin d'aqueu conflicte. D'efiech, per trobar lei ressorsas necessàrias a son esfòrç de guèrra, lo govèrn bolchevic aviá adoptat de mesuras de requisicion violenta (« comunisme de guèrra ») e la màger part dei vilas importantas avián de problemas grèus d'avitalhament. Lei relacions entre l'elèit dau Partit e d'elements revolucionaris de basa se desgradèron donc en causa d'aquelei tensions. Lei marins de la basa navala de Cronstadt, situada sus una illa a l'oèst de Petrograd, èra ansin de sostèns de la revolucion, mai se revoutèron per protestar còntra la confiscacion creissenta dau poder per lo Partit. Reclamèron un retorn ai « fònts » dau movement revolucionari, es a dire un retorn a la democracia dei soviets e la libertat de produccion per leis artesans e lei païsans.

Fotografia d'un assaut bolchevic durant la revòuta.

La reaccion dau govèrn centrau foguèt violenta après una brèva temptativa de negociacions. D'efiech, durant l'ivèrn, l'accès a l'illa èra aisat en causa de la gelada de la mar Baltica. Pasmens, aquel accès dispareissiá a la prima. Quauquei mes après la desfacha dei darrierei tropas antibolchevicas dins la mitat occidentala de Russia, certanei bolchevics crenhavan una intervencion estrangiera novèla a partir d'aquela basa. De son caire, leis insurgents avián de resèrvas importantas de municions e d'obús, mai foguèron pas capables d'organizar una defensa eficaça. Pasmens, lei quilomètres de glaç de passar èran ja un obstacle important e plusors assauts dei fòrças bolchevicas foguèron rebutats. Lei combats durèron ansin dau 7 au 17 de març. Lei tropas rojas foguèron finalament capablas de tornar prendre lo contraròtle de la basa entre lo 17 e lo 18 de març. Perdiguèron entre 527 e 1 412 tuats durant aquelei combats còntra aperaquí un milier per lei defensors. 6 528 insurgents foguèron capturats (2 168 condamnats a la pena de mòrt). Lo rèsta capitèt de s'enfugir vèrs lei regions e país vesins.

Liames intèrnes

• Comunisme de guèrra.
• Guèrra Civila Russa.
• URSS.

Bibliografia

• (fr) Jean-Jacques Marie, Cronstadt, Fayard, 2005.