Republica Socialista Sovietica d'Ozbequistan
La Republica Socialista Sovietica d'Ozbequistan èra una republica constituva de l'Union Sovietica. Proclamada en 1924 e dispareguda en 1991, es a l'origina de la Republica d'Ozbequistan actuala.
.svg)
Territòri pauc desvolopat en 1917, la RSS d'Ozbequistan s'industrializèt dins lo corrent de la Segonda Guèrra Mondiala gràcias a l'installacion d'usinas transferidas dei regions menaçadas per la progression alemanda. En parallèl, Estalin ordonèt l'eliminacion deis elements « nacionalistas » e dau clergat musulman. De revòutas musulmanas recurrentas toquèron donc lo país fins ais annadas 1940 e plusors foncionaris ò caps comunistas foguèron executats, compres Fayzulla Khodzhayev qu'èra estat lo premier cap dau govèrn ozbèc. Pasmens, aquò permetèt tanben la disparicion de l'illetrisme dins leis annadas 1950 e una emancipacion certana dei fremas ozbècas.
Après la fin dau periòde estalinian, lo govèrn centrau sovietic preferiguèt favorizar l'especializacion d'Ozbequistan dins la produccion de coton. Aquò entraïnèt lo desviament d'Amodarià e de Sirdarià e l'utilizacion intensiva de produchs quimics que son a l'origina de la catastròfa ecologica de l'assecament de la Mar d'Aral. De mai, la pression deis objectius de produccion impausats per Moscòu entraïnèt tanben lo desvolopament de la corupcion au sen dau partit comunista ozbèc (afaire dau coton ozbèc en 1983). Fòrça dependent dei republicas europèas pus industrializadas, Ozbequistan assaièt sensa succès de mantenir l'Union Sovietica en 1991 avans de proclamar son independéncia lo 31 d'aost.