Prègadieu
Fotografia d'un prègadieu.
| Règne | Animalia |
|---|---|
| Embrancament | Arthropoda |
| Sosembr. | Hexapoda |
| Classa | Insecta |
| Sosclassa | Pterygota |
| Infraclassa | Neoptera |
| Superòrdre | Polyneoptera |
| Òrdre | Mantodea |
| Familha | Mantidae |
| Genre | Mantis |
Mantis religiosa
(Linnaeus, 1758)
LC : Preocupacion menora
Lo prègadieu (var. pregadieu, prègadiu, prejadieu[1], prègadiu-bernada, prègadiu-bernat, pregadieu de rastoble), prega-Jana, prega-Jaques o bergeironeta (Mantis religiosa en latin) es un insècte carnassier de la familha dei Mantidae qu'es originari dei regions mediterranèa mai d'ara endavant presenta en Asia e en America dau Nòrd.
Alongat, de color sovent identica a son environament, a una pichona tèsta triangulara fòrça mobila ambé d'uelhs desvolopats que li permèton de detectar sei predas. Sei patas anterioras raubairitz son generalament replegadas dins una posicion verticala, similara an aquela d'un cresent crestian en trin de pregar, e son a l'origina de son nom. Lei patas posterioras asseguran sovent lo desplaçament, especialament per lei femèlas que pòdon agantar 5 a 7 centimètres de longor. Lo mascle es sovent pus pichon e mesura de 2 a 3 centimètres. Lo prègadieu caça a l'espèra e pòu s'atacar a totei leis insèctes d'una talha similara ò inferiora a la sieuna.
L'acoblament se debana a la fin de l'estiu. La femèla devora de còps lo mascle e pond entre 200 e 300 uòus. L'espelida a luòc dins lo corrent d'abriu e lei larvas dònan naissença a de joves que van realizar sièis mudas avans de venir adultes. Durant aqueu periòde, son inicialament fòrça vulnerables ais atacas d'autrei predators coma leis aranhas, lei formigas ò leis aucèus.