Galena
La galena[1] es un minerau gris plomb. D'una duretat de 2,5 e d'una densitat compresa entre 7,57 e 7,59, es compausada de sulfur de plomb PbS. Forma de cristaus cubics e, pus rarament, cubooctaedrics. Pasmens, constituís sovent de massas compactas microcristallinas. Son esclat es metallic. Sa temperatura de fusion se situa vèrs 1 115 °C e la galena fond en formant un residü jaune de monoxid de plomb. Es tanben solubla dins l'acid nitric, mai la reaccion entraïna una liberacion d'acid sulfidric. Dins la natura, en causa de l'accion deis agents atmosferics, lei partidas superficialas dei jaciments an tendéncia de s'alterar per formar de cerusita.
Geologicament, la galena se forma principalament dins lei venas idrotermalas de temperatura mejana e dins lei mineralizacions de plomb. Pus rarament, pòu se formar dins de ròcas volcanicas. Es generalament associada amb la blenda, l'argentita, la bornita, la pirita, lo qüars, la fluorina e la calcita. Es un minerau frequent, mai de cristaus de remarca provènon de minas situadas en Anglatèrra, en Alemanha, en Mexic, ais Estats Units e en Austràlia. En Occitània, lo jaciment pus important se situa a Pontgibaud. La galena es esplechada coma minerau de plomb. En mai d'un endrech, contèn tanben d'argent qu'es extrach coma produch segondari (galena argentifèra).
Liames intèrnes
modificarBibliografia
modificar- (fr) Nicola Cipriani (trad. Marie-Hélène Alfonsi e Catherine Sobecki), Minéraux et Roches, París, Gründ, 1996.
Nòtas e referéncias
modificar- ↑ Lei tèrmes galenita (anglicisme), parakobellita, plomb argentifèr e plomb sulfurat se tròban de còps dins la literatura.