Pau Ièr de Russia

Pau I^èr de Russia (1^èr d'octòbre de 1754, Sant Petersborg - 23 de març de 1801, Sant Petersborg) es un emperaire rus que reinèt dau 17 de novembre de 1796 au 23 de març de 1801. Succediguèt a sa maire Catarina II (1762–1796) e foguèt remplaçat per son fiu Alexandre I^èr (1801-1825).

Retrach de Pau I^èr en 1796.

Detestant sa maire, Pau I^èr adoptèt una politica interiora en rompedura amb l'òbra de Catarina II. Modifiquèt ansin lei règlas de succession au tròne rus per impausar la primogenitura masculina en linha dirècta. Liberèt tanben fòrça intellectuaus arrestats durant lo rèine precendent e autorizèt lo retorn deis exiliats. Pasmens, l'element centrau de seis idèas foguèt de defendre l'autocracia en limitant lei libertats de la noblesa. S'inspirant dau modèl prussian, instaurèt donc una disciplina espelucaira e otranciera marcada per la restauracion dei castigs corporaus per lei nobles e de l'obligacion de servir dins l'armada.

A l'exterior, sa politica es mens clara. Placèt Malta sota sa proteccion e se raprochèt de l'Empèri Otoman en mar Mediterranèa. En 1799, mandèt un còrs expedicionari en Itàlia per i combatre lei fòrças francesas revolucionàrias. Pasmens, o retirèt en 1800 en causa de tensions amb Àustria e lo Reiaume Unit. Decidèt alora de se raprochar de Napoleon Bonaparte. Aquò es probablament la causa de son assassinat per un grop d'oficiers.

Liames intèrnes

• Alexandre I^èr.
• Revolucion Francesa.

Bibliografia

• (fr) Henri Troyat, Paul Ier le tsar mal-aimé, Grasset, 2002.