Nabis

Nabis (vèrs 245, Esparta - 192 avC, Esparta) es un rèi usurpator d'Esparta que reinèt de 207 a 192 avC. Marcat per de reformas egalitaristas destinadas a redreiçar la ciutat-Estat, son rèine es considerat coma la darriera temptativa d'enraiar lo declin politic espartenc e sa desfacha entraïna lo declin definitiu de la vila.

Pèça de moneda representant Nabis.

Originari d'una familha aristocratica, èra benlèu liat a la dinastia euripontida. En 207 avC, Nabis prenguèt lo poder après un periòde de trèbols engendrats per la desfacha de Cleomenes III a la batalha de Sellasia. Degun s'opausèt a aquela usurpacion e Nabis inicièt un programa de reformas inspirat per una volontat de retorn ais institucions originalas de la ciutat. Aboliguèt la dobla monarquia tradicionala e creèt un còrs civic de 6 000 ciutadans per tornar formar una falanja oplitica. Puei, menèt un jòc diplomatic complèxe per aprofichar lei conflictes entre Romans e Macedonians. En 197 avC, Felip V li fisèt ansin la garda d'Argòs, una importanta vila de Peloponès. Nabis assaièt alora de se raprochar de Roma per gardar son conquista, mai lei Romans refusèron de reconéisser l'annexion. Après una brèva guèrra, Nabis deguèt abandonar Argòs e la màger part dau territòri espartenc (compres lo pòrt de Gition). Aquò èra una desfacha grèva per Esparta qu'èra desenant reducha a un ròtle fòrça segondari. Nabis foguèt assassinat tres ans pus tard per seis aliats etolians. Sei reformas foguèron annuladas per sei successors.

Liames intèrnes

• Esparta.
• Guèrra de Nabis.

Bibliografia

• (fr) Edmond Lévy, Sparte : histoire politique et sociale jusqu’à la conquête romaine, Seuil, coll. « Points Histoire », 2003.