Metal alcalin

Un metal alcalin (de l'arab القلي, āl-qily que designa la soda) es un element quimic situat dins la primièra colomna (manca l'idrogèn) de la taula periodica dels elements. Aital son de metals alcalins lo liti ₃Li, lo sòdi ₁₁Na, lo potassi ₁₉K, lo rubidi ₃₇Rb, lo cèsi ₅₅Cs e lo franci ₈₇Fr. An un aspècte argentat, son pas gaire durs e tenon una densitat febla.

Son d'elements fòrça reactius e doncas se pòdon pas jamai trobar a l'estat elementari dins la natura, que reagisson immediatament en preséncia d'umiditat. Per neutralizar aquela sensibilitat son servats completament immergits dins d'òli mineral, coma per exemple d'òli de vaselina. Pòdon reagir amb d'alogèns e forman puèi de sals ionicas e s'o fan amb d'aiga genèran d'idroxids basics alcalins.