Maurane
Claudine Luypaerts, dita Maurane, que vadó lo 12 de novembre de 1960 a Ixelles e que's morí lo 7 de mai de 2018 a Schaerbeek. Qu'èra ua cantaira, autora, compositora e comediana bèlga de lenga francesa.
Biografia modificar
Enfança e adolescéncia modificar
Claudine Luypaerts que creishó dens un ambient musicau : la mair ei professora de piano e lo pair qu'èra compositor e director d'ua acadèmia de musica de Verviers. Que seguí cors de vriolon a ueit ans mes que preferí après apréner lo piano, lo cant e la guitarra en autodidacta.[1]
De cap a 16-17 ans, que participè a concors de cant e hestenaus. Que's hè aperar Claudie Claude. A 19 ans, que participè a l'espectacle Brel en mille temps. quan estó arremarcada per lo compositor Alain Barouh que produsí los sons prumèrs 45 torns a partir de 1980.[2]
Debuta de carrièra modificar
Los prumèrs 45 torns, com J'me roule en boule, n'encontrèn pas lo succès. Tà completar las retribucions qui n'èran pas importants, que cantè en los restaurants e per las carrèras. En 1985, que hasó un concèrt a París, au Sentier des Halles. Aqueste espacle que lança la carrièra de la cantaira e que'u permet de produsir un album, Danser, pareishut en 1986. La medisha annada, que participè au Printemps de Bourges e au Hestenau de Jazz de Montreal. [2]
Aviada de la carrièra e succès public modificar
En 1988, qu'integrè la dusau version de la comèdia musicau Starmania, compausada per Michel Berger. Qu'interpretè lo ròtle de Marie-Jeanne, creat en 1979 per Fabienne Thibeault. Que joguè lo son ròtle quaques mes puis que decidè d'arrestar. En 1989, l'album Maurane que pareishó dab la cançon Toutes les mamas. Qu'estò un succès e que'n venó 150 000 exemplars ; la medisha annada, que cantè a l'Olympia e hasó un torn internacionau qui s'acabè au Japon. Que recebó lo prèmi Octave-RFi.[2]
En 1992, l'album Ami ou ennemi qu'estó tanben un succès public dab 450 000 ventas. Que cab las cançons Ça casse e Sur un prélude de Bach. Que hasó un torn en Euròpa.
En 1994, que receu la Victòria de la Musica de la melhora artisa interpèta feminina francofòna de l'annada.
Que participè a concèrts caritatius, per Solidarité Enfants Sida (Sol en Si) o a l'espectacle deus Restos du coeur.
En 1995, que pareishó l'album Différente.
En 1998 que perpausa ua compilacion L'un pour l'autre e qu'interpètra un ròtle dens Le comptoir, un film realizat per Sophie Tatischeff, hilha deu cineasta Jacques Tati.
Qu'enregistrè los albums Toi du monde, inspirat de la mort deu pair en 2000 e Quand l'humain danse, album collectiu en 2003.
Qu'encontrè un navèth succès public en 2009 dab l'album Nougaro ou l'espérance en l'homme, on interprèta las cançons deu cantaire qu'admirava.
Que patí problèmas de santat e qu'estó operada d'un edèma a las còrdas vocaus en 2016.
De 2012 a 2014, qu'estó jurada a l'emission televisada Nouvelle Star, sus la cadena D8.
En 2018, qu'anóncia sus los hialats sociaus que tribalhava a un album navèth en interpretar cançons deu cantaire bèlga, Jacques Brel, aute cantaire qu'admirava. e natiu com era de Schaerbeek.
Vida privada modificar
Lo 29 de deceme de 1993, Maurane e Pablo Villafranca vadón pairs d'ua hilha, Lou.
Mort modificar
Lo 7 de mai de 2018, qu'estó trobada shens vita a soa casa. Qu'avè 57 ans.[3] L'autoritats judiciàrias bèlgas qu'aubrín ua enquèsta entà determinar la causa deu decès. La tèsi d'ua mort naturau qu'ei privilegiada. [4]
Lo 15 de junh, lo parquet que clavè lo dossièr pr'amor de l'abséncia d'infraccion e que declarè que l'encausa deu decès ei accidentau.[5]
Las funeralhas que's debanèn lo 17 de mai de 2018 en la glèisa Notre-Dame des Gràces a Woluwe-Saint-Pierre. [6]
Referéncias modificar
- ↑ http://evene.lefigaro.fr/celebre/biographie/maurane-20048.php (consultat lo 8 de mai de 2018)
- ↑ 2,0 2,1 et 2,2 http://musique.rfi.fr/artiste/chanson/maurane (consultat lo 8 de mai de 2018)
- ↑ https://www.francetvinfo.fr/culture/musique/la-chanteuse-belge-maurane-est-morte-a-l-age-de-57-ans-a-bruxelles_2742387.html Consultat lo 8 de mai de 2018
- ↑ https://www.bfmtv.com/police-justice/mort-de-maurane-une-information-judiciaire-ouverte-en-belgique-1439821.html. Consultat lo 19 de mai de 2018
- ↑ https://www.lalibre.be/belgique/le-parquet-de-bruxelles-conclut-que-maurane-est-bien-decedee-de-cause-accidentelle-5b23be055532a2968878e8e3 Consultat lo 30 d'octobre de 2019
- ↑ https://web.archive.org/web/20191108193507/https://www.rtbf.be/classic21/article/detail_funerailles-de-maurane-de-nombreuses-personnalites?id=9920319 Consultat lo 19 de mai de 2018