Marder III
Lo Marder III es un caçaire de carris alemand de la Segonda Guèrra Mondiala.
Desvolopat a partir dau quadre dau Panzer 38(t) checoslovac e dau canon de 76,2 mm sovietic que de quantitats importantas èran estadas capturadas per leis Alemands en 1941, lo Marder III èra una respònsa ai besonhs de la Wehmarcht de tenir un blindat capable de destrurre lei carris sovietics T-34 e KV-1. Dins lo corrent dau conflicte, conoguèt divèrsei modificacions, principalament per i adaptar lo canon alemand PaK 40 de 75 mm. 1 736 exemplaris foguèron produchs durant la guèrra.
Participèt principalament ai combats sus lo frònt de l'Èst. Fisable e capable de destrurre totei lei carris mejans sovietics dau conflicte, foguèt largament utilizat fins a mai de 1945. Sa feblessa principala èra sa casamata duberta que donava ges de proteccion a l'equipatge còntra leis atacas de l'infantariá e leis explosions d'obús. Aquò entraïnèt l'aplant de sa produccion e son remplaçament per lo Jagdpanzer 38(t).