M18 Hellcat
Lo M18 Hellcat es un caçaire de carris estatsunidenc utilizat durant la Segonda Guèrra Mondiala.
Desvolopat a partir de l'experiéncia obtenguda dei combats en Africa dau Nòrd, èra dotat de divèrsei melhoraments per facilitar lei reparacions e la vida de l'equipatge. Pasmens, gardava la torèla duberta caracteristica dei caçaires de carris estatsunidencs e l'equipatge èra donc fòrça vulnerable ais atacas de l'infantariá e ai tirs d'artilhariá. De mai, son canon de 57 mm aviá pas la poissança necessària per rompre lei blindatges frontaus dei carris Tiger I e Panther. Foguèt produch de julhet de 1943 a octòbre de 1944. 2 507 unitat sortiguèron deis usinas estatsunidencas e lo veïcul participèt a totei lei combats dau frònt de l'Oèst a partir dau començament de l'annada 1944.
Après 1945, lo M18 foguèt rapidament retirat dau servici. D'exemplaris venduts a Iogoslavia, que lei gardèt en resèrva, foguèron utilizats dins leis ans 1990 durant lei guèrras de Iogoslavia.