La Iogoslavia (Jugoslavija dins las lengas eslavas, en cirillic Југославија, significant país dels Eslaus del Sud en sèrbocroat) es un ancian Estat d'Euròpa del Sud-Est, qu'existiguèt jos diferentas formas entre 1929 e 2003. Conteniá los actuals païses de Eslovènia, Croàcia, Bòsnia e Ercegovina, Montenegro, Serbia, Macedònia del Nòrd, e tanben lo Kosova, una republica que l'indepedéncia proclamada lo 17 de febrièr de 2008 es pas entièrament reconeguda per la comunautat internacionala.

La Iogoslavia correspondèt a tres realitats politicas diferentas durant lo sègle XX:

  1. La « primièra Iogoslavia » èra una monarquia fondada lo 1èr de de cembre de 1918. Lo primièr sobeiran èra Pèire Ièr de Serbia. D'en primièr foguèt nomenada: Reialme dels Sèrbs, Croats et Eslovèns, abans d'esser nomenat Reialme de Iogoslavia, lo 6 de genièr de 1929. Aquel Estat existiguèt fins a l'invasion per las tropas de l'Axe lo 6 d'abril de 1941. La capitulacion se debanèt 11 jorns après, lo 17 d'abril de 1941;
  2. La « segonda Iogoslavia » èra una republica federala de partit unic communista, e fondada lo 29 de novembre de 1945. Après l'abolicion oficiala de la monarquia, prenguèt lo nom de Republica federativa populara de Iogoslavia pauc abans l'adopcion d'una novèla constitucion lo 31 de genièr de 1946, e prenguèt son nom definitiu de Republica federativa socialista de Iogoslavia lo 7 d'abril de 1963. Aquela existiquèt fins al 15 genièr de 1992, quand las quatre de sas republicas federadas faguèron secession: l'Eslovènia, la Croàcia, la Bòsnia e Ercegovina e la Macedònia;
  3. La « tresena Iogoslavia » èra un Estat federal format en 1992 sul territòri de la Sèrbia (inclusissint los territòri de Voivodina e del Kosova) e del Montenegro. L'istòria de la Republica federala de Iogoslavia es marcada per una seriá de guèrras civilas qu'oposavan lo poder central e las ancianas diferentas entitats iogoslavas avent proclamat lor independéncia. Lo 4 de febrièr de 2003, lo nom « Iogoslavia » es abandonat e lo país es nomenat Comunautat d'Estats Serbia e Montenegro. Qu'acabèt son existéncia lo 3 de junh de 2006, après l'independéncia du Montenegro.