Legions Checoslovacas
Lei Legions Checoslovacas son un ensemble d'unitats militaras de volontaris chècs e eslovacs que participèron a la Premiera Guèrra Mondiala dins lo camp de la Tripla Entenduda. 145 000 òmes faguèron partida de seis efectius e lei legions foguèron capablas d'alinhar 100 000 òmes sus lei diferents frònts europèus. Aquela importància permetèt ai nacionalistas checoslovacs d'èsser reconeguts coma un element constitiu de l'Entenduda e la reconoissença de l'independéncia de Checoslovaquia foguèt una condicion impausada ais Empèris Centraus tre leis armisticis de 1918. En Russia, lei volontaris checoslovacs aguèron un ròtle important dins lei premierei fasas de la Guèrra Civila Russa onte capturèron uech vagons emplits d'aur que foguèron utilizats per negociar la repatriacion de la legion dins lor país.
Après lor retorn, la màger part dei legionaris participèron a la vida politica de Checoslovaquia. Per exemple, protestèron còntra lo govèrn socialista de Tusar e s'opausèron, sovent violentament, ais Alemands dei Sudèts e ais Ongrés d'Eslovaquia. Avancèron tanben de revendicacions antidemocraticas coma l'establiment d'una dictatura illimitada per lo president Masaryk. Au nivèu economic, fondèron la Banca dei Legions Checoslovacas que venguèt la banca dei classas mejanas dau país fins a la Segonda Guèrra Mondiala.
Liames intèrnes
modificarBibliografia
modificar- (fr) Michel Coistia, Une armée pour un État : L'engagement des Tchèques et des Slovaques dans la guerre de 1914-1918, Le Curieux Vouzinois hors-série n° XVII, Éditions Ville de Vouziers, 2018, 168 p.
Nòtas e referéncias
modificar
