Joan Antòni Peiròtas
Joan Antòni Peiròtas (en francés Jean-Antoine Peyrottes; Clarmont d'Erau, 18 de març de 1813 – 3 de julh de 1858), qu'aviá per escais lo poèta terralhièr, foguèt un escrivan occitan de Lengadòc que coneguèt un succès comparable a lo de Jansemin dins lo país de Montpelhièr.
Biografia modificar
Joan Antòni Peiròtas nasquèt en 1813 a Clarmont, filh del terralhièr Antòni Peiròtas e de Terèsa Elisabet Causse. Aguèt de laissar l'escòla d'ora, aviá sonque 9 ans, per ajudar la familha amb son trabalh. Coma son paire venguèt terralhièr mas a l'encòp escriguèt de poesias que foguèron publicadas dins divèrses jornals e revistas. Sos escriches impregnats de còps que i a de criticas o satiras socialas li portèron d'enemistats e aital se retrobèt al tribunal per de vèrses qu'aviá escrich contra un jutge de patz en 1839 e aguèt de passar quinze jorns en preson.
A mai se Peiròtas faguèt pas jamai de politica activament, dins sas poesias defendiá las idèas republicanas e mai intervenguèt per prendre la defensa del deputat de Montpelhièr, de Larcy, en publicar de poesias en sa favor dins l'Echo du Midi. Se maridèt puèi en 1845. Quand arribèt la Revolucion de 1848 un bon nombre de democratas e liberals del departament d'Erau li demandèron de se presentar a las eleccions per venir deputat.
Escambièt divèrsas letras amb d'autres escrivans e erudits del país bas lengadocian coma Alfred Moquin Tandon, Mary Lafon o Melquiòr Bartés. Escriviá sovent d'articles dins l'Indépendant.
Foguèt, lo 1 de març de 1838, un dels fondadors del Grenier poétique, una societat literària del país de Clarmont.
Òbras modificar
- Los orjolets (1835)
- Apoteòsi de P.-P. Riquet (1838)
- Poesias patesas (1840)
- Las fadejalhas (1842)
- A Jansemin (d'Agen), poèta-perruquièr (1848)
Ligams extèrnes modificar
Bibliografia modificar
- J.-A. Peyrottes, poète-potier: 1813-1858. Lettres inédites et documents a Occitanica
- Jean Antoine Peyrottes, Pouésias patouèzas del taralié, presentacion per Joan Francés Blanc, articles d'Achille Jubinal e Léon Rouquet, reproduccion de l'edicion originala de 1840, Edicions Talvera, 2010, ISBN 979-10-90696-07-5