Invasion de Danemarc

L’invasion de Danemarc per Alemanha se debanèt lo 9 d'abriu de 1940 durant la Segonda Guèrra Mondiala. Premiera etapa de la campanha de Norvègia, èra destinada a la conquista de posicions estrategicas per renforçar la defensa dau nòrd dau Reich e preparar lo passatge deis estrechs danés. Fòrça mau preparat, Danemarc dispausava de solament 13 500 òmes dispersats sus son territòri e lo rèi Cristian X voliá mai que mai empachar la destruccion de Copenaga. En fàcia, leis Alemands alinhavan 55 000 òmes sostenguts per de naviris e una aviacion importanta.

Posicion defensiva danesa lo 9 d'abriu de 1940.

Lei combats comencèron vèrs 4h15. Leis Alemands ataquèron plusors posicions lòng de la frontiera germanodanesa, leis aeropòrts d'Alborg, Copenaga e plusors posicions destinadas a permetre una avançada rapida dau gròs dei fòrças vèrs la capitala danesa. Pasmens, Cristian X capitulèt rapidament. Divèrseis unitats isoladas danesas menèron de combats defensius còntra lei colonas alemandas avans de recebre l'òrdre de cessar lo combat. Per aquela rason, lo bilanç uman de l'invasion es de solament 26 Danés e 20 Alemands tuats. Pus important per lei fòrças alemandas, totei leis infrastructuras foguèron capturats intactas.

Danemarc obtenguèt de condicions d'ocupacion relativament clementas e son govèrn poguèt contuniar de foncionar normalament fins au 29 d'aost de 1943. De mai, fins a aqueu periòde, leis Alemands respectèron globalament l'autonòmia d'aqueu govèrn dins la gestion de seis afaires intèrnes. Pasmens, après d'eleccions favorablas ai partits antinazis en març de 1943 e de grèvas importantas, lo Reich prenguèt lo contraròtle dirècte dau país. Aquela desfacha menèt a l'ocupacion de Groenlàndia e d'Islàndia per leis Aliats. A l'eissida dau conflicte, lo segond territòri demorèt independent.

Liames intèrnes

• Campanha de Norvègia.

Bibliografia

• (en) Douglas C. Dildy e John White, Denmark and Normway 1940 : Hitlers Boldest Operation, Osprey Campaign n° 183, 2007.