Iniciativa per Occitània
Iniciativa per Occitània es un laboratòri politic, cultural e social qu'a per tòca d'avançar, per sa reflexion e son accion, vèrs l'emancipacion d'Occitània. Defend lo drech del pòble occitan de dispausar de se e de se constituir en nacion independenta. Se fondèt en 2003 a Montpelhièr e son sèti es a Ais de Provença.
Iniciativa per Occitània prepausa de practicar un occitanisme descomplexat, amb d'objectius politics ambicioses per lo país, en tot parlar de las preocupacions quotidianas de la populacion. Vòl tirar los aspèctes positius de totes los grands menaires del renaissentisme occitan e ne far la sintèsi :
- de Robèrt Lafont vòl reprene la vision socioistorica, la demolicion dels mites identitaris e l'ambicion sociolingüistica de desvolopament de l'occitan.
- de Francés Fontan vòl reprene lo patriotisme e l'ideal umanista que liga los tres fronts d'emancipacion (emancipacion de las classas socialas desfavorizadas, emancipacion dels joves e de las femnas contra lo patriarcat, emancipacion dels pòbles subordenats contra los estats dominants).
- de Frederic Mistral vòl retenir l'ambicion literària, la volontat de tornar al pòble occitan una fiertat culturala, la vision panoccitana de la lenga e son trabalh de lexicografia (Lo Tresaur dau Felibritge).
- de Fèlix Castanh vòl retenir sa crida a la creacion artistica autocentrada e antiprovinciala. Pasmens Iniciativa Per Occitània critica l'antiindependentisme de Castanh.