Imne d'Ucraïna

"Shche ne vmerla ukrainy i slava, i vola" (ucraïnian: ще не Вмерла україни і і слава, і воля), tanben conegut per son títol oficial d'"Imne d'Estat d'Ucraïna" (Державний Гімн України, Derzhavnyj Himn Ukrajiny) o dins sa forma abreujada : "Shche ne vmerla Ukrajina" (Ще не вмерла Україна, lit. Ucraïna es pas encara mòrta), es l'imne nacional d'Ucraïna. Es un simbòl de l'Estat e del país.

La particion de l'imne nacional d'Ucraïna, per corala e piano.

Las paraulas constituisson una version leugièrament modificada de la primièra estròfa d'un poèma patriotic escrit en 1862 pel poèta Pavlo Chubynsky, un eminent etnograf de Kyiv. En 1863, Mykhailo Verbytsky, compositor ucraïnian occidental e prèire grèc-catolic, composa una musica per acompanhar lo tèxte de Chubynsky. La primièra representacion corala de la pèça aguèt luòc al Teatre ucraïnian de Lviv, en 1864.

Dins la primièra mitat del sègle XX, durant las tentativas infructuosas d'independéncia e de creacion d'un Estat a partir dels territòris de l'Empèri Rus, de Polonha e d'Àustria-Ongria, la cançon èra l'imne nacional de la Republica populara ucraïniana, de la Republica populara ucraïniana occidentala, e de la region de Carpato-Ucraïna. Un concors foguèt organizat per un imne nacional après la secession d'Ucraïna de l'Union sovietica, una de las cançons essent "Za Ukrajinu" (en occitan "Per Ucraïna") de l'escrivan e actor ucraïnian Mykola Voronyi. "Shche ne vmerla Ukrainy i slava, i volia" foguèt oficialament adoptat par la Verkhovna Rada (parlament) ucraïniana lo 15 de genièr de 1992. Las paraulas oficialas foguèron adoptadas lo 6 de març de 2003 per la lei sus l'imne ucraïnian (Закон про Гімн України).