Hauffiosaurus

Hauffiosaurus ei un genre de reptil marin escantit, apartenhent ara familha des plesiosaures. Demorèc pendent eth jurassic inferior (hè 182 milions d'ans). Es sues despulhes an sigut trapades en Alemanha e Anglatèrra.

Descripcion

Aguest reptil marin ère relativaments petit e quauques espècies èren pas mès longues de 3,5 m. Hauffiosaurus avia un còth mès cuert que non pas d'autes pliosaurids (un tresau dera longada deth cos). Eth cap, d'aperaquí uns 40 cm, ère long e era maishèra encara mès. Es aletes èren plan longues (es uassi umer e femur èren es mès longui de toti es plesiosaures).

Classament

Eth prumèr fossil trapat de Hauffiosaurus siguec trapat en eth sègle XIX mès siguec pas descrit enquia 2001. Siguec trapat laguens es plaques de Holzmaden, en eth sud d'Alemanha e ei ua esqueleta sancera. De prumèr siguec classat coma un Rhomaleosaurus (Thaumatosaurus) mès dempús classat en ua espècies pròpia deamb eth nom de Hauffiosaurus zanori. Es uassi confermen qu'ère un especimèn adult.

En 2011 siguec descrita ua navèra espècia de Hauffiosaurus, Hauffiosaurus tomistomimus, trapat ena formacion de Whitby Limestone, en Yorkshire, en Anglatèrra. Aguesta espècia ère mès grana qu'era auta e era esqueleta hèia d'aperaquí 4,85 m. Eth madeish estudi includiguèc tanben ua auta espècia que de prumèr se pensava qu'ère un Macroplata. Siguec aperada damb eth nom de Hauffiosaurus longirostris e hèia 5 m de longada.

Non se sap de segur quina ère era sua familha: se pòt díder de segur qu'ère un plesiosaure dera familha des pliosaurids o des romaleosaurids. Segontes un estudi hèt per Ketchum e Benson en 2011 Hauffiosaurus ère un pliosaure, eth grop de plesiosaures damb còth cuert e cap gran. Semblava mès un Thalassiodracon que non pas un Attenborosaurus o ua auta forma de pliosaure deth jurassic miei e superior.

Paleobiologia

Pauqui plesiosaures deth jurassic inferior avien ua cara coma era de Hauffiosaurus, long e sobtil. Açò hè pensar qu'avia ua dieta a base de peishi. Es dents èren longues e damb linhes verticals e pòt èster qu'avesse caçat victimes damb eth cos.

Eth sòn nom ei tà aunurar eth museu Hauff, en Holzmaden, en Alemanha, on se trapa er olotipe. Aguest museu privat siguec establert per Bernard Hauff (1866-1950), qu'estudièc toti es fossils que venien dera formacion de Holzmaden. Er epitet especific zanoni ei tà aunurar eth paleontològ american Robert Thomas Zanon (1957-1990). Es autes epitets especifics des autes espècies sòn tà hèr referència ara sua forma. Atau, Hauffiosaurus longirostris vò díder qu'à ua cara longa, Hauffiosaurus tomistomimus qu'ei com un gavial ( ua espècia de crocodil ) pas vertadièr pr'amor que son cran sembla coma eth deth crocodil d'aué Tomistoma schlegelii.

Bibliografia

· T. E. White. 1940. Holotype of Plesiosaurus longirostris Blake and classification of the plesiosaurs. Journal of Paleontology 14(5):451-467

· Frank Robin O'Keefe 2001: A cladistic analysis and taxonomic revision of the Plesiosauria (Reptilia: Sauropterygia). — Acta Zool. Fennica 213.

· Roger B. J. Benson, Hilary F. Ketchum, Leslie F. Noè and Marcela Gómez-Pérez (2011). "New information on Hauffiosaurus (Reptilia, Plesiosauria) based on a new species from the Alum Shale Member (Lower Toarcian: Lower Jurassic) of Yorkshire, UK". Palaeontology 54 (3): 547–571. doi:10.1111/j.1475-4983.2011.01044.x

· Hilary F. Ketchum and Roger B. J. Benson (2011). "A new pliosaurid (Sauropterygia, Plesiosauria) from the Oxford Clay Formation (Middle Jurassic, Callovian) of England: evidence for a gracile, longirostrine grade of Early-Middle Jurassic pliosaurids". Special Papers in Palaeontology 86: 109–129. doi:10.1111/j.1475-4983.2011.01083.x

· Peggy Vincent (2011). "A re-examination of Hauffiosaurus zanoni, a pliosauriod from the Toarcian (Early Jurassic) of Germany". Journal of Vertebrate Paleontology 31 (2): 340–351. doi:10.1080/02724634.2011.550352

· R. B. J. Benson and P. S. Druckenmiller. 2013. Faunal turnover of marine tetrapods during the Jurassic–Cretaceous transition. Biological Reviews