Thalassiodracon

Thalassiodracon hawkinsi ei un reptil marin escantit dera familha des plesiosaures. Demorèc pendent eth jurassic inferior ( en er Hettangian, hè 200 milions d'ans ). Es sues despulhes sigueren trapades en Anglatèrra e ei classat coma un des prumèrs plesiosaures.

Descripcion

Thalassioadracon siguec descurbert peth conegut paleontològ Richard Owen en eth sègle XIXau e ère un tipic plesiosaure deth jurassic.

Coma tot es plesiosaures Thalassiodracon auia aletes qu'èren coma ramas tà nedar ena mar e un còth long mercès ath qual podie gahar e caçar peishi. Eth son còth, totun, ère mès cuert que non pas eth d'autes plesiosaures que demoraren dempús. Auia demest 27 e 31 vertèbres cervicals. En açò qu'ère disparièr de Plesiosaurus, que n'auia demest 35 e 37. Eth cran ère plan cuert e damb dents plan longues. Es uelhs èren tanben plan granes e damb anèth sclerotic.

Ua tomografia deth cran e d'autes estudis an permès trapar naues dades anatomiques. Atau, Thalassiodracon auia ua cresta sus era esquia, quate dents premascellars e ua maishèra eterodonta. D'autes caracteristiques de Thalassiodracon son es horats deth foramen ena superficie lateral der uas esoccipital o éster plesiomorf, çò que vò díder que semblaua plan un plesiosaure tipic. Com eri, Thalassiodracon auia un parietal que s'espandia entà darrèr e ua gran fin posterior dera premaishèra atau coma un proces posterovental der uas postorbital (coma Hauffiosaurus e d'autes plesiosaures).

Classament

Siguec descrit per prumèr còp per Richard Owen e aperat Plesiosaurus hawkinsii e pr'açò siguec classat de segur coma ua espècie primitiua de Plesiosaure. En 1996 Storrs e Taylor punlicaren un estudi en eth qual defensauen qu'ère ua espècie disparièra deres classades coma Plesiosaurus. Pr'açò didíen qu'auia d'éster includit en un nau genre, Thalassiodracon ( que vò díder drac dera mar). Se pensa qu'aguest animal siguec un des especimèns mès ancians deth grop des plesiosaures e dilhèu un ancessor dera superfamilha des pliosaurids (plesiosaures damb eth còth cuert).

Peres sues caracteristiques fisiques ère un predator marin e sòns grani uelhs e anèths sclerotics an permès es scientifics de hèr quauques ipotesis tà descríuer era sua vida: Aguests anèths probaubaments èren tà hèr es uelhs mès hòrts quan er animal baishaua a granes prohonditats mès se pensèc que demoraua ena superficie des mars. Es grans uelhs èren ua adaptacion ara menor lutz que i auia pendent es nets o ara vision sus er aigua en airaus pas gaire clars.

Bibliografia

· Storrs, G W & Taylor, M A. 1996. Cranial anatomy of a new plesiosaur genus from the lowermost Lias (Rhaetian/Hettangian) of Street, Somerset, England. Jour. Vert. Paleo. 16:403-20.

· R. B. J. Benson, K. T. Bates, M. R. Johnson and P. J. Withers. 2011. Cranial anatomy of Thalassiodracon hawkinsii (Reptilia, Plesiosauria) from the Early Jurassic of Somerset, United Kingdom. Journal of Vertebrate Paleontology 31(3):562-574