Fèlix Arnaudin

Simon Arnaudin dit Fèlix Arnaudin (La Bohèira 30 de mai de 1844 - 6 de deceme de 1921) que ho un escrivan e fotograf gascon de las Lanas deu sègle XIX, collectaire de contes com Joan Francés Blader.

Fèlix Arnaudin

Que vadot dens una familha borgesa de La Bohèira, on passèt tota sa via. Après un escac dens sos estudis au Mont de Marsan, que tornèt a son on tombèt amorós de la goja de l'ostau, dab la quala divot víver maritalament dincas a la mòrt d'aquera quauquas annadas avant ith - un maridatge ne seré pas estat corrècte. Assistent impoderós a la descomposicion de son vielh monde, nostalgic, que's botèt en quèsta d'aquira civilizacion en via de disparicion. Munit d'un aparelh fotografic e de sa bicicleta, que percorrot la soa Lana Gran a la recèrca de contes, cants e costumas, dap hòrt de meticulositat e de mauhidença ; qu'aprengot a jogar la flaüta traversèira entà milhor transcríver los cants audits dens las bòrdas. Mès que's sentit incomprés, mesprisat, e qu'arrefusèt sovent los convits que li transmetoren los Felibres biarnés. Son permèr volum de contes que recebot un arculh mitijat, e, renforcent sa mauhidença, que ralentit hòrt la soa publicacion deus cants de la Lana Gran. Qu'es après la mòrt de Maria (sa conjunta) que se refugièt tot empenat dens ua misantropia militanta.

Una partida de sas òbras estut publicada per la Société des Amis de Félix Arnaudin a la fin de las annadas 1950.

Contèxte istoric

Ostau nadau de Fèlix Arnaudin, a La Bohèira

Fèlix Arnaudin que vadó dens çò qu'aperam uei lo massís horastèr de las Lanas de Gasconha mes que, a son epòca, èra ua mosaïca de seuvas (casses o pins), de camps e de lana rasa, terrenhs de parcors de quauque 650 000 ovins que comptava lo departament. Aqueth país que viscó d’un mòde de produccion pastorau, dont l’equilibri anava èster romput, en aqueth mitan deu sègle XIXe, au profiet de la silvicultura. La data simbolica d'aquesta revolucion qu'ei la lei deu 19 de junh de 1857 sus la valorizacion de las Lanas de Gasconha, que incita las comunas a véner o a semiar los comunaus, condamnant a tèrmi lo sistèma agropastorau dens las Lanas de Gasconha.

Bibliografia

• Arnaudin, Fèlix. Contes. Ortès : Per Noste, 2005.
• Œuvres complètes Volume 1 : Contes populaires de la Grande Lande, Confluences, Bordèu, Pargue Naturau Regionau de las Lanas de Gasconha, Belin (e Beliet), 2002.
• Œuvres complètes Volume 2 : Proverbes de la Grande-Lande, Confluences, Bordèu, 1996.
• Œuvres complètes Volume 3 : Chants populaires de la Grande-Lande 1, Confluences, Bordèu, 1995.
• Œuvres complètes Volume 4 : Chants populaires de la Grande-Lande 2, Confluences, Bordèu, 1997.
• Œuvres complètes Volume 5 : Correspondance, Confluences, Bordèu, 2000.
• Œuvres complètes Volume 6 : Dictionnaire de la Grande-Lande 1, Confluences, Bordèu, 2001.
• Œuvres complètes Volume 7 : Dictionnaire de la Grande-Lande 2, Confluences, Bordèu, 2001.
• Œuvres complètes Volume 8 : Journal et choses de l'ancienne Lande, Confluences, Bordèu, 2003.
• Œuvres complètes Volume 9 : Index général, Confluences, Bordèu, 2007.