Elbroz

Lo Mont Elbrós (5 642 m) es una montanha de Caucàs situada en Russia dins lo nòrd d'aqueu massís montanhós. Es la cima pus auta dau continent europèu. Es un volcan d'aspècte simetric qu'es constituït de dos brecs. La cima occidentala es la pus auta e la cima orientau, qu'assosta un cratèr de 300 a 400 m de diamètre, aganta una altitud de 5 621 m. Sa formacion comencèt i a 10 Ma e son activitat actuala es relativament limitada amb una darriera erupcion datada entre lei sègles III e I avC. L'ensemble de la montanha es cubèrta per de glaciers importants e es lo centre d'un pargue nacionau creat en 1986.

Fotografia dau Mont Elbrós dempuei lo nòrd de la montanha.

Au nivèu culturau, la cima dau mont Elbrós foguèt lo luòc dau castig prononciat per Zèus còntra Prometèu. Lo Titan foguèt estacat entre lei doas cimas de la montanha e una agla foguèt cargada de li manjar lo fetge cada jorn. La premiera ascension aguèt luòc en 1829 e la guida Killar Khachirov foguèt lo premier alpinista qu'arribèt a la cima. Aquela ascension es considerada coma tecnicament simpla mai es sovent complicada per lei condicions meteorologicas.

Liames intèrnes

• Caucàs.