Dark wave
La dark wave (l'èrsa escura) es un terme que foguèt a l'origina emplegat marginalament coma sinonim de ròck gotic o al lòc de cold wave, o se pòt tanben veire coma un sosgenre contemporanèu del dich ròck gotic. L'expression fa, plan solide, resson al terme new wave, que n'es un derivat.
Semblariá que cold wave foguèt dins las annadas 1980 puslèu emplegat sul continent europenc, en Belgica e en França (Occitània compresa),[1] mentre que los países anglofòns de las Islas Britanicas, los Estats Units e lo Canadà, an tostemps emplegat lo tèrme de dark wave, d'alhor escrich puslèu darkwave aus Estats Units.
A l'ora d'ara, dark wave es devenguda l'expression la mai emplegada per qualificar çò que se disiá ròck gotic dins las annadas 1980 e 1990. E coma i aviá una nuança entre la new wave al sens larg e la synthpop per qualificar lo sosgenre dels grops qu'emplegavan lo sintetizor coma instrument principal, existís la meteissa nuança entre la dark wave (ex-ròck gotic) al sens larg coma per exemple la musica de Lebanon Hanover, e la synthwave, lo sosgenre compausat dels grops qu'emplegan lo sintetizor coma instrument màger, per exemple lo grop american Light Asylum.
Se pòt plan solide tanben trobar de còps una filiacion enre la synthpop e la synthwave, vist que i a d'unes grops synthwave que reivindican coma referéncias grops synthpop o aparentats coma tal, per exemple Visage, New Order, Orchestral Manoeuvres in the Dark o encara Depeche Mode.