La cencha de Kuiper (de còps apelada cencha d'Edgeworth-Kuiper), es una zona del Sistèma Solar s'estendent al delà de l'orbita de Neptun, entre 30 e 55 unitats astronomicas (UA). Aquesta zona en forma d'anèl es similara a la cencha d'asteroïdes, mas pus estenduda, 20 còps mai larga e de 20 a 200 còps pus massissa. Coma la cencha d'asteroïdes, se compausa principalament de còrses pichons, de rèstas de la formacion del Sistèma Solar, e d'almens una planeta nana, Pluton. Al contrari, mentre que la cencha d'asteroïdes se compausa principalament de còrses rocoses e metallics, los objèctes de la cencha de Kuiper son largament constituits de compausats volatils glaçats coma lo metan, l'amoniac o l'aiga.

Vista artistica de la cencha de Kuiper e de la nívol d'Oort.

Dempuèi la descobèrta del primièr objècte en 1992, mai de mila autres son estats descobèrts dins la cencha de Kuiper, que contendriá mai de 70 000 còrses de mai de 100 km de diamètre. Seriá la resèrva principala de las cometas periodicas que lor periòde de revolucion es inferior a 200 ans. Los centaures e los objèctes escampilhats, coma Éris, ne serián resultants. Triton, lo satellit pus grand de Neptun, porriá èsser un objècte de la cencha de Kuiper que seriá estat capturat per la planeta. Pluton es l'objècte mai grand conegut de la cencha de Kuiper.

La cencha de Kuiper es pas de confondre amb la Nívol d'Oort, zona encara teorica e supausada d'èsser mila còps pus aluenhada. Los objèctes de la cencha de Kuiper, amb los objèctes escampilhats e tot membre potencial de las nívols de Hills e d'Oort, son collectivament nomenats objèctes transneptunians.