Black metal

Lo segond album de Venom, pareishut en 1982, que s'aperava Black Metal. Literalament : "metal negre", en referéncia a la magia negra. La musica de Venom qu'èra un heavy metal hèra simple e brutau (au mensh per l'epòca; que cau saber que los grops de metal que volón sovent estar LO grop mei brutau o LO mei rapide, a partir dels ans 80) dab ua votz pas guaire melodica e las loas paraulas que parlavan de la religion crestiana d'un punt de vista revendicat com satanista.

Ja que l'estil musicau de Venom a l'epòca estosse hèra diferent de çò qui aperam black metal uei lo dia e ja qu'eths ne's prenossen pas au seriós en parlant de Satan e de satanisme, que'us podem parièr considerar com los ajòus espirituaus deu black metal.

Istorica

Dens los ans 80, d'autes grops que practiquèn ua musica influenciada per Venom : Bathory, Hellhammer, Celtic Frost, etc... Quauques uns (mes pas tots) que's revendicavan deu black metal. Mes los ans 80 que son l'epòca on lo death metal e lo thrash metal se fòrman tanben e se destrejan l'un de l'aute. Death, thrash e black metal, a l'epòca, ne son pas tostemps de bon diferenciar, vist que los tres estils recèrcan la rapiditat e la brutalitat de la musica e que las paraulas parlan haut o baish deus medish tèmas : mort, satanisme, agressivitat... Au començament dels ans 90, navèths grops que començan de's har enténer, mei que mei dens los país escandinaus : Burzum, Mayhem, Dark Funeral, Darkthrone, etc... Aqueths grops navèths qu'an ua navèra faiçon d'abordar la musica ... mes tanben la vita! Mantuns d'aqueths musicians que s'arretrobaràn en preson, que seràn tuats o que's suicidaràn.

Musica

Aquera segonda generacion de grops (cf paragraf precedint) que codificarà e qu'estabilizarà l'estil musicau e estetic deu black metal. Los estandards impausats per eths que demoran respectats peus gops de uei lo dia e que podem díser, donc, que lo black metal n'a pas guaire evoluat despuish ençà.

Caracteristicas màgers de la musica :

Brutalitat, dab ua utilizacion frequenta deu blastbeat

Nada recèrca de la proessa tecnica, au contra d'ua bona part deus grops de death metal. Los soli de guitarra que son reales ; las melodias e los acompanhamenrts que son sovent deus simples. Lo grop VON qu'anarà dinc a limità's a tres o quate nòtas repetidas en bocla per cada de las soas cançons.

Recèrca d'ua cèrta "magestat" dens las melodias, sovent sus ritmes ternaris. Que i a a còps, per'mor d'aquò, un contrasta enter la bateria hèra rapida (blastbeat) e la lentor de la melodia, qui hè que non sabem pas mei si lo rapide o lent.

Crits (o vocaus) mei que mei aguts...

Produccion sonòra de baisha qualitat : los grops de uei qu'an tendéncia a pensar qu'un rendut sonòre tròp "net" ne convien pas au black metal. Quauques uns que decideishen donc d'enregistrar la loa musica dab materiau vielh o de maishanta qualitat, quan ac poderén har dab mei de miejans. Qu'ei tanben ua faiçon de's pausar dens la filiacion deus grops dels ans 80 e 90 qui s'enregistravan ... com ac podèn! Tots los grops ne huegeishen pas los estudiòs professionaus, totun e que cau saber que si los enregistraments de grops ancians an sovent un son de maishanta qualitat, qu'ei per'mor ne's podèn pas enregistrar autadament. Quauques uns, com Blut Aus Nord, que hèn ua recèrca sus la sonoritat qui's poderé apariar, deu punt de vista de l'auditor, a musica experimentau.

Ideologia(s)

Oposicion au cristianisme

La segonda generacion de grops de black metal (cf paragraf "istorica") que's destrejava tanben deus autes estils musicaus dens la faiçon qui los sons musicians avèn de pensar e de víver. Si los musicians e los fans de death metal s'interessavan a las tematicas de la religion e de la mort d'un punt de vista artistic, la màger part que demoravan atèus e, per aver lo peu long, qu'èran persona "normaus". Au contra, los musicians de black metal escandinaus deu debut dels ans 1990 qu'avèn conviccions religiosas de las pregondas, satanistas per la màger part, neopaganas a còps mes en tot cas opausadas au cristianisme e a las valors de la societat dens la quau vivèn. Aquò que'n possè quauques uns a formar ua mena d'organizacion criminau, los "satanic terrorists" (los "terroristas satanics"), gavidats per un petit grop de musicians, l'Inner Circle dont hasèn partida Varg Vikernes de Burzum e Euronymous de Mayhem. Que cometón quauques crimes, en particular incendis de glèisas en Norvègia.

Satanisme

La majoritat deus grops que's revendican satanistas mes las loas paraulas, luenh de las ideologias d'Aleister Crowley o d'Anton Szandor La Vey, que glorifican Cohet com ua entitat reau. Quauques uns, dens las loas entervistas, qu'afirman que Diu e Cohet existeishen e qu'eths son en luta contra lo purmèr e en aligança dab lo segond (Enochian Crescent, per exemple). Per d'autes, la musica n'ei pas un simple art mes tanben un instrument de magia negra (Dissection o Blut Aus Nord)

Nihilisme

Neopaganisme

Extrèma dreta

Si las referéncias mei o mensh explicitas aus crimes cometuts peus soldats alemands pendent la Segonda Guèrra Mondiau son viste vadudas banalitats dens las paraulas de metal extrèm, ua infima minoritat de grops de black metal que's revendican neonazis; que fòrman un sotaestil, lo national socialist black metal o NSBM, hòrt marginau. D'autes, mei finòts, que s'ac viran per har passar idèas d'extrèma dreta dens albums de black metal "classics" per virà's la censura. Atau , lo grop Impaled Nazarene qu'a hèit mantuas cançons anticomunistas e omofòbas hòrt violentas. Mes atencion de non pas generalizar : mantuns autes grops qu'estón (o que son enquüèra) acusats a tòrt d'estar neonazis.

Shens opinion

Lo black metal qu'ei donc un art extrèm qui ei estat creat per monde dab conviccions e personalitats extrèmas. Mes dab la popularitat qui's ganhè aquera musica, monde mei ordinaris que s'i interessèn e que comencèn de la practicar. Atau, grops com los Paulins de Nauar que revendican de har black metal shens ideologia.

Estetica

"Mòda"

Los grops escandinaus dels ans 90 que's volón tanben diferenciar deus grops de metal "normaus" per la loa aparéncia. Atau sus l'empont e sus las fòtos promocionaus, qu'avèn tostemps la cara pintrada de negre e blanc a la manièra (presumida?) deus chivalièrs teutonics (e tanben deus grops Kiss e Merciful Fate). Grops com Mayhem o Dark Funeral qu'an ua mesa en scèna hèra morbida dab animaus morts vertadèrs (caps de pòrcs empalats sus crotz, caps de boc pelats, etc...) o un cantaire qui s'escarifica tà de bonas (Dead e Maniac de Mayhem). Shens n'arribar aquiu, d'autes que's mulhan de faussa sang o de sang d'animaus abans de pujar sus l'empont. D'autes enqüèra, qui s'interèssan meilèu a l'heroic fantasy o l'edat miejana, qu'aiman de's har véder dab armas blancas com espadas, destraus o massas dab puntas. Enfin la màger part qu'an lo peu long e que son los mei grans consumaires de braçaus de cuèr dab claus qui coneishem. N'evocam pas de mòda femenina dens aqueste paragraf per'mor l'immensa majoritat deus musicians de black metal que son òmis.

Discs, afichas, T shirts, etc...

Sus las publicacions de black metal, que vedèm sovent simbèus satanics com la crotz de la part envèrsa o lo pentagrama dab la punta tau baish. La màger part deus grops qu'an un lògo qui hè que lo lor nom ei de mau deschifrar. Las tematicas de la mort, deu subernaturau crestian (broishas, demònis, Satan...) o popular (èlfs, dracs...), de la guèrra (medievau o modèrna), de las mitologias nordicas o anticas (grècolatinas, assirianas, babilonianas, etc...) que son tanben utilizadas.

Vejatz tanben

Portal de la musica

Portal del rock