Batalha dei Dardanèls
La batalha dei Dardanèls es una batalha de la Premiera Guèrra Mondiala qu'opausèt l'Empèri Otoman a un còrs expedicionari francobritanic dau 18 de març de 1915 au 9 de genier de 1916. L'objectiu deis Aliats èra de desbarcar dins leis Estrechs per ocupar Constantinòble e assegurar la liason amb Russia. Pasmens, en despiech de la mobilizacion de fòrças importantas (16 divisions), leis Aliats se turtèron a una resisténcia acarnada e ben organizada (15 divisions) e avancèron pas. Après la revirada de plusors ofensivas, abandonèron son projècte e retirèron sei tropas.
Leis Aliats i perdiguèron 252 000 òmes e leis Otomans entre 218 000 e 251 000. Dins lo camp turc, se destrièt lo generau Mustafa Kemal que comandava la defensa otomana. Sa victòria li donèt un prestigi important que li permetèt, après lo conflicte, de prendre lo poder sota lo nom d'Atatürk.