Batalha de Yalu (1894)
La batalha de Yalu (ò batalha de la Mar Jauna) se debanèt lo 17 de setembre de 1894 durant la Premiera Guèrra Sinojaponesa (1894-1895). Opausèt una flòta chinesa de 14 naviris comandada per l'amirau Ding Ruchang a una esquadra japonesa de 12 naviris dirigida per l'amirau Ito Sukeyuki. Lei doas flòtas èran equipadas d'unitats modèrnas de tipe europèu mai lei Japonés dispausavan d'un entraïnament e d'un comandament superiors. Lo bilanç complèt de la batalha foguèt de 5 naviris perduts, 3 damatjats, 850 tuats e 500 bleçats per lei Chinés còntra 4 naviris damatjats, 280 tuats e 200 bleçats per lei Japonés. Aquò marquèt una importanta victòria per la marina militara nipona qu'aquistèt lo contraròtle de la mar fins a la fin dau conflicte.
