Batalha de Shanghai

La batalha de Shangai se debanèt dins lo corrent de la Segonda Guèrra Mondiala dau 13 d'aost au 17 de novembre de 1937. Opausèt la Republica de China a l'Empèri Japonés. Foguèt la consequéncia d'una ofensiva japonesa còntra la vila e de la volontat chinesa d'arrestar l'avançada rapida dei tropas advèrsas per permetre lo transferiment deis industrias litoralas estrategicas vèrs lei regions interioras.

La Republica de China alinhèt 75 divisions (700 000 òmes) mai l'armament èra principalament compausat d'armas leugieras d'infantariá. En fàcia, lei Japonés èran mens nombrós (300 000 òmes) mai l'equipament (3 000 avions e 300 carris leugiers) e lo comandament èran superiors. Lo debanament de la batalha pòu se devesir entre tres periòdes :

• dau 13 au 22 d'aost, lei Chinés assaièron sensa succès d'eliminar lei tropas japonesas desbarcadas a l'entorn de Shangai.
• dau 23 d'aost au 26 d'octòbre, lei Japonés organizèron una tiera de desbarcaments per renfòrçar sa preséncia dins la vila e son relarg. Aquò entraïnèt de combats urbans violents e saunós entre lei doas armadas.
• dau 27 d'octòbre au 17 de novembre, lei Chinés, desbordats per lei desbarcaments enemics, foguèron obligats de se retirar en direccion de la capitala Nanquin.

La batalha foguèt saunosa per lei dos camps. Lei Chinés perdiguèron aperaquí 280 000 òmes (200 000 tuats, bleçats e dispareguts) e lei Japonés 92 600 tuats, bleçats e dispareguts, 85 avions e 51 naviris.

Fotografias

• 
  Posicion defensiva chinesa dins una carriera de Shanghai.
• 
  Posicion defensiva chinesa a una crosiera de Shanghai.
• 
  Incendi d'un quartier de la vila durant la batalha.
• 
  Soudats japonés dins lei roïnas de Shanghai.
• 
  Desbarcament de soudats japonés dins lo corrent de la batalha.
• 
  Fotografia famosa intitulada Bloody Saturday mostrant un ninet cremat.
• 
  Ataca de soudats chinés a l'entorn de Shanghai.
• 
  Infantariá navala japonesa dins lei roïnas de Shanghai.
• 
  Victimas chinesas d'una ataca quimica japonesa.