Batalha de Peleliu
La batalha de Peleliu se debanèt dau 15 de setembre au 25 de novembre de 1944 dins lo corrent de la Segonda Guèrra Mondiala. Opausèt una fòrça d'assaut de 32 000 òmes, sostenguts per una esquadra gropants 6 cuirassats, 8 crosaires e 8 pòrta-avions, a la garnison japonesa de l'illa qu'alinhava 11 000 òmes. En causa de la revirada dei bombardaments navaus que mau capitèron de destrurre lo ret de fortificacions japonés, leis asalhidors se turtèron a una resisténcia acarnada. La presa de l'illa, que sa superfica es de solament 13 km², foguèt donc lònga e saunosa. Leis Estatsunidencs perdiguèron aperaquí 8 400 òmes (1 500 tuats e 6 900 bleçats) e lei Japonés foguèron quasi anientats (solament 200 presoniers) car refusèron de capitular. La batalha foguèt fòrça criticada au sen de l'armada estatsunidenca en causa dei pèrdas importantas subidas e de l'interès estrategic quasi nul de l'illa.
