Batalha d'Okinawa
La batalha d'Okinawa se debanèt dins lo corrent de la Segonda Guèrra Mondiala dau 1èr d'abriu au 22 de junh de 1945. Foguèt la consequéncia d'una ofensiva estatsunidenca còntra l'illa d'Okinawa qu'èra protegida per 87 000 a 117 000 soudats japonés e per un important ret de fortificacions. Esperant una resisténcia acarnada coma per lei batalhas precedentas, leis Estatsunidencs reüniguèron de fòrças considerablas gropant 541 000 òmes (183 000 participant ai combats terrèstres) e 1 300 naviris. Plusors naviris britanics participèron tanben ais operacions.
Fòrça violenta e saunosa, la batalha s'acabèt per una victòria aliada que costèt entre 75 000 e 90 000 òmes (12 000 tuats e 60 000-75 000 bleçats), 38 naviris, 763 avions e 225 carris ai fòrças estatsunidencas. Pasmens, lei pèrdas japonesas foguèron encara pus importantas ambé un nombre de combatents tuats ò suicidats estimats entre 77 000 e 110 000. Solament 7 000 soudats foguèron capturats. De 40 000 a 150 000 civius foguèron tanben tuats dins lo corrent de la batalha ò se suicidiguèron. Enfin, lei pèrdas materialas dei defensors foguèron de 16 naviris, 7 800 avions, 27 carris e 743 pèças d'artilhariá. Aperaquí un desenau de milièrs de soudats japonés demorèron esconduts dins l'illa e foguèron pauc a pauc capturats durant lei mes seguents.