Bala Minié

La bala Minié es un tipe de projectil d'armas de fuòc leugieras desvolopada en França en 1848-1849. Destinada au fusiu Minié, marca una revolucion dins leis armas de guèrra car sa forma cilindrica necessitava l'usatge d'un canon raiat per la tirar. Aqueu tipe de canon permetiá de donar un movement de rotacion a la bala qu'estabilizava sa trajectòria. Lei performàncias (poissança, precision, portada...) èran fòrça superioras ai balas esfericas utilizadas per lei fusius dei periòdes precedents.

La bala Minié èra facha de plomb e èra lubrificada per la preséncia de graissa dins leis òscas de sa basa. Sus lo prat batalhier, la bala Minié èra preparada d'una cartocha de papier. Lo soudat deviá estraçar la cartocha e vujar la pouvera dins lo canon de l'arma per la boca. Puei, faliá plaçar la bala e esquichar l'ensemble amb una bagueta. Aquò permetiá de deformar lo plomb per permetre a la bala d'intrar en contacte amb lei caneladuras dau canon. Durant lo tir, la bala intrava en rotacion e la graissa assegurava l'estanqueïtat dau sistèma per aumentar la pression dei gas de combustion de la pouvera e, donc, la velocitat de sortida dau projectil.

La bala Minié e sei derivats foguèron utilizadas a partir de la Guèrra de Crimèa (1853-1856) e adoptadas per la màger part dei poissanças militaras dau periòde durant leis ans 1850-1860. La Guèrra de Secession (1861-1865) veguèt sa generalizacion. D'efiech, autorizava un tir precís e eficaç fins a 450 m. En revènge, sa velocitat, son calibre sovent important (17,8 mm per lo fusiu Minié) e sa malleabilitat venguèron la causa de bleçaduras atròças menent sovent a l'amputacion[1].

Liames intèrnesModificar

BibliografiaModificar

  • (en) Brent Nosworthy, The Bloody Crucible of Courage, Fighting Methods and Combat Experience of the Civil War, Carroll and Graf Publishers, 2003.

Nòtas e referénciasModificar

  1. (en) John Keegan, The American Civil War: A Military History, Knopf, 2009, p.55.