Aleksis Kivi
Aleksis Kivi (10 d'octòbre de 1834, Nurmijärvi - 31 de decembre de 1872, Tuusula) es un escriban finlandés de la segonda mitat dau sègle XIX. Es famós per èsser l'autor dau premier roman major de la literatura finesa, Seitsemän veljestä (« Sèt fraires » en occitan).
Nascut a Nurmijärvi dins una familha populara finesa, intrèt a l'escòla a 12 ans e capitèt d'intrar a l'Universitat de Helsinki en 1859. I estudièt la literatura e s'interessèt au teatre. A partir de 1863, comencèt sa carriera d'escriban e ganhèt plusors prèmis. Dins aquò, la manca de reconóissença e una santat mentala febla entraïnèron una desgradacion de son estat[1]. Après divèrsei problemas, moriguèt dins la pauretat a 38 ans.
Inspirada per lo romantisme e lo realisme, son òbra foguèt un modèl per plusors generacions d'escribans finlandés, especialament en matèria de teatre. De mai, aguèt una larga difusion internacionala ambé la traduccion de son roman Seitsemän veljestä e sa pèça Kullervo en mai d'un desenau de lengas.