Agulha de Cleopatra
L'Agulha de Cleopatra (en anglés: Cleopatra's needle) es lo nom que foguèt donat a dos obelisques egipcians que datan del règne del faraon Totmòsis III. Totes dos foguèron desplaçats d'Alexàndria durant lo sègle XIX e se tròban actualament l'un dins Londres al Victoria Embarkment, a ras de Tamèsi, e l'autre dins Central Park a Nòva York. Son nom es estat atribuït erronèament a la reina Cleopatra mas en realitat existís pas cap de ligam amb ela. De còps que i a l'obelisc de Loxòr, situat a París, es considerat coma una tresena Agulha de Cleopatra.
Descripcion dels obelisques
modificarAmbedoas agulhas, que formavan abans un parelh a Alexandria, son estadas escalpradas dins de granit ròsa de las peirièras d'Assoan. Mesuran aperaquí 21 mètres e pesan mai o mens 224 tonas. Son ondradas d'ieroglifs del temps de Totmòsis mas qualques inscripcions son posterioras, que foguèron apondudas 200 ans mai tard per Ramsès II per commemorar sas victòrias militaras.
La despartida d'Egipte
modificarEn 1819, lo sobeiran d'Egipte Mehmet Alí decidiguèt d'ofrir un dels dos obelisques d'Alexandria al govèrn britanic. Aqueste acceptèt, mas per encausa del còst enòrme del transpòrt a Londres del monument aquela operacion se retardèt. Foguèt sonque en 1877 que la primièra Agulha de Cleopatra partiguèt d'Africa, gràcias al mecenat d'un anatomista e dermatològ anglés, Sir William James Erasmus Wilson que paguèt aperaquí 10.000 liuras per cobrir los còstes de l'expedicion. L'obelisc foguèt transportat dins un vaissèl creat per l'ocasion, lo Cleopatra.
La segonda agulha foguèt ofèrta per Ismaïl Pasha al govèrn francés mas l'egiptològ occitan Joan Francés Champolion jutgèt dins un rapòrt que li demandèt lo ministèri de marina que valiá mai transportar los obelisques de Loxòr que los d'Alexandria. Foguèron fin finala los americans que s'i interessèron e gràcias a l'industrial milionari William Henry Vanderbilt foguèt portada fins a Nòva York e installada a Central Park en 1881.