Armillaria mellea
L’armillar de mèu (Armillaria mellea en latin) es un bolet dau genre Armillaria e de la familha Physalacriaceae.
Es una espècia polimòrfa que pòu presentar de variacions relativament importantas entre dos ensembles d'especimens. Lo capèu, de 1 a 15 cm, es inicialament emisferc e sarrat per una vela blanca. Vèn pauc a pauc convèx avans de s'aplatir. Es de color jaune clar a brun rogenc e pus sorn dins sa partida centrala. Lei lamellas son inegalas e blancas. Viran pauc a pauc vèrs lo jaune e, de còps, vèrs lo brun. Leis espòras son blancas. Lo pè es prim mai robust. Pòu agantar una talha de 2 a 20 cm. Pòrta un anèu blanc membranós. Sa partida superiora es blanca e sa partida inferiora es pus sorna, sovent d'una color similara aquela dau capèu.
La carn es blanca. L’armillar de mèu èra aperavans jutjat coma comestibla mai es uei considerat coma toxic. Creis sus lei fuelhuts vivents ò mòrts, e pus rarament sus lei conifèrs, de la fin de l'estiu au començament de l'ivèrn. Es un parasit de mai d'una espècia d'aubre utilizada en silvicultura. De confusions son possiblas amb d'autreis armillars.