Agaricus bitorquis

Agaricus bitorquis

Descripcion d'aqueste imatge, tanben comentat çaiaprèp

Agaricus bitorquis

Classificacion
Règne	Fungi
Division	Basidiomycota
Classa	Agaricomycetes
Sosclassa	Agaricomycetidae
Òrdre	Agaricales
Familha	Agaricaceae
Genre	Agaricus

Nom binominal

Agaricus bitorquis
(Quél.) Sacc., 1887

Agaricus bitorquis es un bolet de la familha deis Agaricaceae e dau genre deis Agaricus. A la particularitat de venir mai que mai sus lei trepadors e dins lei terrens fòrça peirós. Es considerat coma comestible, mai sa consumacion es deconselhada en causa de la pollucion captada per lo bolet durant sa creissença.

Descripcion

Es un bolet de talha mejana que pòu agantar 5 a 10 cm d'autor. Lo capèu, d'un diamètre de 6 a 12 cm, es poput e leugierament aplanat au centre. Sa color varia dau blancàs a l'òcre clar. Lei lamas son liuras. Son inicialament ròse clar e evolucionan pauc a cha pauc vèrs lo brun negràs. Leis espòras son brun negràs e an una talha de 6 × 5 µm. Lo pè a la meteissa color que lo capèu. Pòrta un anèu doble. La carn es fòrça fèrma. Es blanquinosa e vèn ròse clar au tocar. L'odor e la sabor son agradivas.

Ecologia

Agaricus bitorquis vèn mai que mai a proximitat dei rotas dins lei terrens peirós. Durant sa creissença, pòu traucar lo betum dei trepadors. Creis principalament durant l'autona, mai es de còps observat a la prima quand lei condicions meteorologicas son umidas.

Comestibilitat

Agaricus bitorquis fa partida deis Agaricus, mai en causa de son luòc de creissença, sa carn es sovent contaminada per de quantitats importantas de polluents. Sa consumacion es donc desconselhada.

Confusion

I a una possibilitat de confondre Agaricus bitorquis amb lo pradelon (Agaricus campestris) que pòu tanben venir a proximitat dei rotas. Aquò es pas grèu car aquela espècia es un comestible recercat. En revènge, i a egalament de riscs de confusion amb leis agarics dau grop xanthoderma (que son toxics) e amb leis especimens joves d'amanitas blancas (que son mortalas).