Abadiá de Senta Maria de la Regla

L'abadiá benedictina de Santa Maria de la Regla de Limòtges, en Lemosin, dins lo departament de Nauta Vinhana, fuguet fondada en 817 per Loís lo Piós. Aperteniá a la diocesi de Limòtges e a la província eclesiastica de Borges.

Abadiá benedictina de femnas, dirigida per de las abadessas eissidas de la noblessa lemosina, fuguet un important convent juscanta la Revolucion Francesa, a la fin dau segle XVIII.

L'egleisa abadiala e las bastissas monasticas fugueren gaireben completament destruchas au segle XIX e la resta vers 1960. Lo museu de l'eveschat de Lemòtges garda daus elements escultats que daus claveus de l'ancian portau. Un ancian refectòri e sas cavas voutadas fugueren entierament restaurats. Sos lo site de l'anciana lòtja de l'abadessa demòra un sosterranh.

Aprep 1790 las bastissas monasticas abrigueren un ostau de detencion. Lo Grand Seminari fuguet bastit a l'entorn de la lòtja de l'abadessa sos lo Prumier Emperi e i demoret juscanta 1905. 'Na chapela serv d'annexe a la mediateca municipala, au depaus legau regionau e per lo Museu de la Resisténcia. Lo centre d'acuelh daus companhs dau «Torn de França» se tròba dins l'ancian refectòri. La plataforma ente se situava l'essenciau de la bastissa fuguet tre alara ocupada per 'na part dau jardin botanic de l'eveschat.