Yoshida Kenkō

Yoshida Kenkō (japonés:吉田兼好); (1283?–1350?) èra un autor japonés e un monge bodista. Es tanben conegut sota lo nom d'Urabe Kenko.

Son òbra mai coneguda es Tsurezuregusa («Leis Oras ociosas»), una deis òbras pus estudiadas de la literatura medievala japonesa, escrichas pendent lei periòdes Muromachi e Kamakura.

Vida e òbras

Kenkō nasquèt probable en 1283, fiu d'un oficiau de l'administracion. Son nom originau èra Urabe(no) Kaneyoshi (japonés:卜部兼好). Venguèt oficier dei gardas au palais imperiau. Pus tard, se retirèt de la vida publica, cambièt son nom en Yoshida Kenkō, e venguèt un monge bodista (secta Tendai) e un ermitan. Lei rasons ne'n son pas conegudas, mai èra supausat qu'èra benlèu a causa d'un amor malurós per la filha dau prefècte de la província d'Iga, o una transformacion causada per son dòu après la mòrt de l'emperor Go-Uda.

Bèn qu'ague tanben escrich de poesia e participat en de concors de poesia a la cort imperiala (existís de traças de sa participacion en 1335 e 1344), la reputacion de Kenkō es fondada sus son Tsurezuregusa, compausat de 243 corts assais e publicat après sa mòrt. Leis assais pòrtan sus la beutat de la natura, lo caractèr transitòri de la vida, lei tradicions, l'amistat, e d'autrei concèptes abstrachs. L'òbra es escricha dins l'estil zuihitsu (seguir lo pincèu), un tipe d'escritura au fieu deis idèias que permete au pincèu de l'escrivan de passar d'un subjècte a l'autre, menat solament per la direccion de sei pensadas. Certanei partidas son de pichonei remarcas d'una frasa o doas, d'autrei fan quauquei paginas, sovent amb un comentari personau.

Lo Tsurezuregusa èra ja popular au sègle XV, e foguèt considerat coma un classic partent dau sègle XVII. Es encara au programa dei licèus japonés.