Virginia Bolten
Virginia Bolten (vèrs 1870, San Luis (Argentina) - vèrs 1960, Montevideo) èra una militanta anarquista e feminista argentina d'origina alemanda.
Filha d'un emigrat alemand qu'èra marchand corredís, foguèt rapidament obligada de trabalhar dins una fabrica de cauçaduras e dins una rafinariá de sucre de Rosario. I rescontrèt Juan Marquez, sòci dau sindicat de la cauçadura, que venguèt per la seguida son marit. Puei, en 1888, participèt a la redaccion d'un jornau anarquista El Obrero Panadero de Rosario avans d'organizar de manifestacions e de grevas a partir de l'annada seguenta. Arrestada mai d'un còp per la polícia, s'orientèt mai vèrs lo feminisme e participèt en 1896 a la fondacion dau jornau feminista La Voz de la Mujer.
En 1905, foguèt expulsada ambé son marit en Uruguai onte contunièron son combat. En 1911, l'eleccion de José Batlle y Ordóñez entraïnèt l'adopcion de mai d'una reforma progressista coma la separacion de la Glèisa e de l'Estat, la jornada de trabalh d'uech oras, l'instauracion dau sufragi universau, la legalizacion dau divòrci, la creacion d'ajudas socialas e d'escòlas publicas, l'accès deis universitats ai fremas e de nacionalizacions. Aquò permetèt d'amaisar la situacion sociala en Uruguai e lo movement anarquista i perdiguèt son influéncia. Ansin, a partir deis annadas 1910, la vida Virginia Bolten es mau coneguda e la data precisa de sa mòrt dins un barri de Montevideo es desconeguda.