Tatiana Ventôse
Tatiana Jarzabek, dicha Tatiana Ventôse, es una videasta web politica francesa nascuda lo 24 de febrièr de 1988 a Nancí (Lorena). Es mai que mai coneguda coma animatritz e cofondatritz de caps fin 2015 del mèdia sus internet Le Fil d'actu. Publica tanben d'analisis politicas sus sa pròpria cadena YouTube.
Inicialament, es classada politicament a esquèrra, aderís quitament al Partit d'Esquèrra en 2012 (fins a decembre de 2015). Pasmens, sa postura populista, son vocabulari, sas frequentacions ambigüas (Greg Tabibian), sas tematicas e presas de posicions (per exemple rapòrt a las susmautas en seguida de la mòrt de Nahel Merzouk) o encara son sosten a Marine Le Pen al segond torn de las eleccions presidencialas de 2022 « per far barratge a Emmanuel Macron » fan que fòrça monde la categorizan d'ara enlà puslèu coma una influenciaira d'extrèma drecha.[1]
En 2016, participa a lançar lo movement On vaut mieux que ça (valèm melhor qu'aquò) per luchar contra la lei El Khomri e participa brèvament tanben al movement Nuèch Dreches (en francés : Nuit debout).
A la fin de novembre de 2018, Tatiana Ventôse es presenta dins lo Movement dels Corsets Jaunes e ne fa l'analisi.
Lo 31 de genièr de 2019, anóncia son intencion de se presentar a las eleccions europèas e lança lo Mouvement V. que la tòca es de « tornar bastir França », ambe lo videaste web (sus YouTube) Greg Tabibian. Co-escrivon quitament un libre entitolat Jusqu'ici tout va (très) mal, fins ara, tot va (fòrça) mal.
Al segond torn de l'eleccion presidenciala de 2022 en França, crida a votar per la candidata d'extrèma drecha Marine Le Pen per far baratge a Emmanuel Macron.[2]
Pendent las susmautas en seguida de la mòrt de Nahel Merzouk,[3] estima dins una video que los policièrs deurián aver l'autorizacion de « tirar a vista » suls insurgents « sens aver de recasudas ».
Son pseudonim « Ventôse » fa referéncia a las leis de ventôse an II promulgadas pendent la Primièra Republica francesa.
En genièr de 2017, Tatiana Ventôse a recebut lo quatren « Prètz etic » de l'annada de la part de l'associacion Anticor.
En 2019, Le Fil d'actu compta 100 000 abonats. La meteissa annada, Tatiana Ventôse fa partida del « tòp 5 de las creatrises a descobrir en 2018 » mesas endavant per YouTube per la jornada internacionala de las femnas.
En març de 2022, la revista Challenges la classa seisena d'un « tòp 10 dels influenciaires politics mai populars » ambe sos 332 900 abonats sus YouTube e Instagram.
Referéncias
modificar- ↑ Tatania Ventôse, nouvelle cible à abattre https://www.causeur.fr/quand-le-magazine-elle-fait-la-chasse-aux-influenceuses-de-l-extreme-292180
- ↑ L’icône de la gauche Tatiana Ventôse préfère voter « Le Pen plutôt que Macron ! » https://lemediaen442.fr/licone-de-la-gauche-tatiana-ventose-prefere-voter-le-pen-plutot-que-macron/
- ↑ De la mort de Nahel aux émeutes urbaines, le récit des sept nuits qui ont embrasé la France https://www.ouest-france.fr/societe/faits-divers/de-la-mort-de-nahel-aux-emeutes-urbaines-le-recit-des-sept-nuits-qui-ont-embrase-la-france-abe54730-19b1-11ee-a274-cd245df77ae9