T-26
Lo T-26 es un carri d'infantariá leugier produch per l'URSS a 12 000 exemplaris entre 1931 e 1941. Inspirat per lo Vickers 6-Ton britanic, èra armat d'un canon de 45 mm e d'una mitralhièra de 7,62 mm. Son blindatge èra relativament feble e lo carri foguèt totjorn vulnerable ai projectils tirats per lei canons anticarri. Son autonòmia èra tanben limitada. Dins aquò, au començament deis ans 1930, sei performàncias èra corrèctas e lo T-26 foguèt chausit per formar la basa dei fòrças blindadas de l'Arma Roja.
Lo T-26 participèt ai conflictes de la segonda mitat deis ans 1930 coma la Guèrra d'Espanha, lo començament de la Segonda Guèrra Mondiala en Asia e la batalha de Khalkhin Gol. I obtenguèt de resultats positius còntra lei carris de sa generacion (Panzer I alemand, L3 italian). Pasmens, la feblessa de son blindatge foguèt egalament demostrada durant aquelei combats. Vengut obsolèt en 1941, lo T-26 foguèt clarament dominat per lei carris alemands engatjats dins leis ofensivas dau Plan Barbarossa. Plusors miliers de T-26 foguèron ansin destruchs ò abandonats durant lei premierei setmanas de l'invasion e lo carri foguèt abandonat per lei Sovietics en 1942. En revènge, leis Alemands e lei Finlandés utilizèron de modèls capturats per d'operacions còntra de grops de partisans fins a la fin de la guèrra.