Tèrra de Francés Josèp
La Tèrra de Francés Josèp es un archipèla d'origina volcanica de la Mar de Barents situat au nòrd de la Nòva Zembla. Compren 191 illas d'una superficia totala de 16 134 km² que son somesas a un clima polar. Foguèt oficialament descubèrta en 1875 per l'expedicion austroongresa de Julius von Payer (1841-1915) e Karl Weyprecht (1838-1881). Pasmens, foguèt benlèu observada per lo navegaire Nils Fredrik Rønnbeck (1820-1891) dins leis ans 1860. L'archipèla recebèt lo nom de l'emperaire Francés Josèp I d'Àustria (1848-1916) mai foguèt pas annexat.
Durant la premiera partida dau sègle XX, leis illas foguèron revendicadas per Norvègia e per Russia. Aquò durèt fins a son annexion definitiva en 1926 per l'URSS. Lei Sovietics i fondèron quauquei basas militaras ò meteorologicas e l'accès ais illas foguèt reduch per de mesuras administrativas. Durant la Guèrra Freja, foguèt considerada coma una posicion estrategica per defendre lo nòrd de l'Union Sovietica e l'espaci entre la Tèrra Francés Josèp, la Nòva Zembla e Siberia foguèt utilizat per mai d'un entraïnament militar. Après 1991, un santuari naturau i foguèt creat per protegir la fauna e la flòra. Uei, Russia garda quauquei installacions dins l'archipèla mai lo nombre d'ocupants es feble (17 en 2013).