Sejalèir

Lo Sejalèir (prononciat [sødzaˈvɛ][1]) o Chasalèir (en francés Cézallier) es un replanat dau Massís Centrau e un contrada d'Occitània situada en Auvèrnhe. Es un replanat d'origina volcanica que se parteja entre los departaments de Chantau e de Puèi de Doma, dins lo pargue naturau regionau daus volcans d'Auvèrnhe.

Paisatge dau Sejalèir.

L’altitud mejan dau massís se situa entre 1 200 e 1 500 m. Lo ponht culminant n'es lo senhau dau Luguet (1 551 m).

Sa vila principala es Alancha.

Toponimia

Carta de Cassini (sègle XVIII) mençonant la Montanha dau Sejalèir

Es en partir dau sègle XVIII que lo Sejalèir fuguèt presentat per los scientifics, los administrators mai los escrivans coma un massís o coma una montanha. Lo nom de Sejalèir figurava pancara sobre las cartas relevadas per los oficèirs de l’estat-major a la fin dau sègle XIX, que mençonavan màs lo « senhau dau Luguet », batejant coma aquò lo ponht mai naut dau vialatge dau Luguet, que comptèt josca 1400 abitants a la fin dau sègle XIX. L’usagte popular coneissiá pas la region dau Sejalèir nimai de region dau Luguet. Aquò-es los cartografs e geografs que bailèron una extension au nom de Sejalèir e que ne'n faguèron un massís, mentre que tradicionalament es màs una cima. D'avora ençai, lo nom de Sejalèir es inscrit coma un massís d’Auvèrnhe dins la nomenclatura geografica dau Massís Centrau.

Geografia

Situacion dau Sejalèir dins l'anciana region Auvèrnhe

Lo Sejalèir ocupa una posicion centrala dins los monts d'Auvèrnhe. Es bordat au nòrd per los monts Dòr e au sud per los monts de Chantau. A l'oèst, Artensa fai transicion ambé los monts de Lemosin mentre qu'a l'èst s'espandís la plana de Limanha.