Sètge de Tobruk
Lo sètge de Tobruk se debanèt dins lo corrent de la Segonda Guèrra Mondiala dau 10 d'abriu au 27 de novembre de 1941. Foguèt la consequéncia dei cambiaments d'estrategia decidits per lei dos camps après lo succès britanic de l'Operacion Compass au començament de l'annada. D'un caire, leis Aliats decidèron de donar la prioritat au frònt grèc e laissèron solament de fòrças reduchas e mau equipadas en Libia. D'autre caire, leis Alemands mandèron de renfòrç ais Italians permetent d'organizar una còntra-ofensiva (Operacion Sonnenblume, 6 de febrier - 25 de mai de 1941). Batudas, lei fòrças dau Reiaume Unit e de sei dependéncias se retirèron a la precipitada en direccion d'Egipte. Pasmens, laissèron una garnison per ocupar lo pòrt de Tobruk e empachar son utilizacion per l'Axe. Avitalhats per la flòta britanica, lei defensors capitèron de resistir fins au retorn de l'armada britanica durant l'Operacion Crusader.
