Sètge de Cartage (698)

Lo sètge de Cartage de 698 es un sètge qu'opausèt una armada d'invasion araba ai defensors bizantins de la vila. S'acabèt per la presa definitiva de la ciutat per leis Arabs, çò que foguèt un succès considerable per lo Califat Omeia e li permetèt de dirigir seis armadas vèrs lo rèsta de Magrèb e vèrs la Peninsula Iberica.

Ja presa en 695 per leis Arabs, Cartage foguèt reconquistada per una ataca suspresa de la flòta bizantina. Pasmens, lei defensors deguèron faciar una situacion malaisada en causa dau nombre limitat d'òmes e de problemas d'avitalhament. Ansin, mau capitèron d'organizar una defensa eficaça e leis Arabs poguèron mandar una armada de 40 000 combatents dins la region. Après quauquei combats exteriors, lei Bizantins se retirèron dins la vila onte foguèron atacats per d'assauts terrèstres e maritims. Pus nombrós, leis asalhidors capitèron de rompre lei defensas mai se turtèron a una resisténcia acarnada que menèt a la destruccion de la màger part de la vila. Lo rèsta de l'armada bizantina se retirèt dins leis illas de la Mediterranèa per gardar la possibilitat de secutar seis adversaris.

La conquista de Cartage permetèt ais Arabs d'acabar la conquista de Magrèb en 702. Per lei Bizantins, aquò entraïnèt la pèrda de la tresena vila pus important de l'Empèri e la fin de sa preséncia dins la region. De mai, economicament, significava la pèrda d'una region agricòla druda.

Liames intèrnes modificar

Bibliografia modificar

Nòtas e referéncias modificar