Sèt Còlas de Roma

Las Sèt Còlas de Roma (en italian i Sette Colli di Roma, en latin Septem Montes Romae) son una sèria de còlas qu'istoricament formavan lo còr de la ciutat de Roma. Situadas a l'èst del riu de Tibre, aquel ensems geografic es eponim per fòrça d'obratges literaris e son una referéncia correnta dins la cultura populara.

Las sèt còlas de la Roma antica èran, dins lo sens de las agulhas d'una mòstra:

lo Palatin (en italian Palatino, en latin Mons Palatinus)
lo Capitòli (en italian Campidoglio; en latin Capitolium, Mons Capitolinus)
lo Quirinal (en italian Quirinale, en latin Collis Quirinalis)
lo Viminal (en italian Viminale, en latin Collis Viminalis)
l'Esquilin (en italian Esquilino, en latin Mons Esquilinus)
lo Cèli (en italian Celio, en latin Mons Caelius)
l'Aventin (en italian Aventino, en latin Mons Aventinus)

Figuran en bona plaça dins la mitologia romana, e mai dins la religion e la politica de la Roma antica; tradicionalament, se conta que la ciutat originala seriá estada fondada per Romul e Rème sul Palatin.

D'en primièr las sèt còlas èran ocupadas per de pichons masatges que s'agropèron e que formèron çò que se coneguèt mai tard coma la vila de Roma.

Autras còlas

A Trastevere se tròban las còlas del Vatican (en italian Vaticano, en latin Mons Vaticanus) e la del Janicul (en italian Gianicolo, en latin Mons Ianiculus), que son pas comptadas entre las sèt còlas tradicionalas. Tanben i a lo Pincio (Mons Pincius), situat al nòrd, e, ancianament, la Vèlia (Mons Velia), dins la zòna del Forum Roman e los Forums Imperials, e d'autres.