Quimiquier
Un quimiquier es un naviri cistèrna destinat au transpòrt de produchs quimics. Son de naviris de talha pichona a mejana (5 000 a 40 000 tonas) dotats de cistèrnas d'acier inoxidable e de sistèmas tecnologicament avançats per assegurar lo transpòrt de cargaments perilhós ò costós. En 2003, aperaquí 1 700 quimiquiers èran en servici dins lo mond.
Lo quimiquier apareguèt dins lo corrent deis ans 1940 per assegurar lo transpòrt de produchs quimics entre lei diferentei zònas industrialas situadas lòng dau litorau estatsunidenc. Èra alora generalament un petrolier modificat. Lei premiers quimiquiers modèrnas apareguèron dins lo corrent deis annadas 1950 ambé l'adopcion de cistèrnas pus pichonas, de revestiments protectors especiaus e de sistèmas de contraròtle de la temperatura. Un decenni pus tard, èran equipats de tecnologias pus avançadas per melhorar lo contraròtle dei produchs e la seguretat.
A l'ora d'ara, tres tipes principaus existisson que son lo petrolier/quimiquier destinat au transpòrt de produchs petroliers rafinats e de produchs quimics pauc perilhós, lei quimiquiers polivalents destinats au transpòrt de diferentei substàncias gràcias a un nombre important de cistèrnas (fins a 30 ò 40) e lei quimiquiers especializats generalament concebuts per lo transpòrt d'un produch unic amb de proprietats fòrça particularas (fosforiquiers, soupriers, etc.).