PlayStation 2
La PlayStation 2 (abreujat oficialament PS2) es una videoconsòla de seisena generacion comercializada per Sony Interactive Entertainment, filiala de Sony. Es sortida lo 4 de març de 2000 a Japon, lo 26 d'octobre de 2000 en America, lo 24 de novembre de 2000 en Euròpa e lo 30 de novembre de 2000 en Austràlia. La consòla èra en concurréncia amb la Dreamcast de Sega, la GameCube de Nintendo e la Xbox de Microsoft.
La PlayStation 2 a succedit a la PlayStation dins la gamma del meteis nom. A conegut una capitada immediata amb un milion d'exemplars venduts en qualques jorns a Japon. La PlayStation 2 atenh un total de 150 milions d'exemplars expedits en data del 31 de genièr de 2011 çò qu'en fach la consòla de salon la mai venduda de l'istòria dels videojòcs. Sony afirma qu'existís 10 828 títols de videojòc disponibles sus la consòla e que 1,52 miliard d'exemplars d'aqueles títols son estats venduts dempuèi lo lançament de la consòla. Pendent la fin de l'annada 2009, mentre que la consòla es comercializada dempuèi près d'una decennia, Sony explica que la PlayStation 2 demorarà sul mercat tant que i aurà de crompaires per sos jòcs. Aquesta es seguida per la PlayStation 3 en 2006.
La PlayStation 2 es uèi la consòla mai venduda de l'istòria del videojòc.
12 ans après son lançament, Sony anóncia oficialament l'arrèst de la distribucion de la PlayStation 2 a Japon, lo 28 de decembre de 20128 (contunhava totjorn de se vendre onorablament, figurant encara dins lo Top 10) e dins la rèsta del mond lo 4 de genièr de 2013.
Una pagina se vira dins l'istòria del videojòc e pel constructor japonés, qu'aviá fach sensacion amb la sortida d'aquela consòla en març de 2000, a una epòca ont inclure sustot de seria la lectura dels DVD (format alara tot recent) dins aquel tip d'aparelh èra una innovacion importanta.
Istòria
modificarLo desvolopament de la PlayStation 2 es menat per Ken Kutaragi. La consòla es oficialament anonciada al salon E3 l'11 de mai de 1999. L'aparéncia de la consòla e la data de sortida japonesa son desveladas al salon Tokyo Game Show en setembre de 1999. La consòla deviá inicialament sortir en França lo 26 d'octobre de 2000 mas son lançament serà regetat al 24 de novembre de 2000
La PlayStation 2 es lançada lo 4 de març de 2000 a Japon, lo 26 d'octobre de 2000 en America del Nòrd, lo 24 de novembre de 2000 en Euròpa e lo 30 de novembre de 2000 en Austràlia. Lo lançament es marcat per l'afogament del public e dels retards d'aprovesiment. A Japon, las 980 000 consòlas prepausadas son partidas en 48 oras. Dificultats de produccion menan Sony a fornir dos còps manca de consòlas que previst pels lançaments american e europèu. En França, 150 000 unitats son prepausadas abans Nadal e solas la mitat son disponiblas al jorn del lançament (dont 50 000 unitats reservadas). Al 23 de març de 2001, Sony a ja escorrut 10 milions de maquinas dins lo mond.
Vendas
modificarLas vendas de la PlayStation 2 son estimadas a un pauc mai de 150 milions d'exemplars en 2011. La barra dels 100 milions d'unitats distribuïdas es atencha en novembre de 2005, cinc ans e nòu meses après lo lançament de la consòla a Japon. La PlayStation, primièra consòla de salon a aver atench aquel cap, a mes nòu ans e sièis meses en comparason. La reparticion de las vendas suls tres pòls del mercat es de mai o mens 40% per America del Nòrd, 38% per Euròpa e 22% per Japon (e Asia). En 2004, la consòla ocupa 70% del mercat de las consòlas de videojòc.
Lo prètz de la consòla al lançament es fixat a 39 800 ¥ a Japon, a 299 USD als Estats Units e a 2990 francs (599 € en 2020 amb l'inflacion) en França.[1][2]
Lo 7 de novembre de 2012, Sony a anonciat sus Twitter l'arrèst plan venent de la produccion de la PlayStation 2. La darrièra usina en activitat a barrat sas pòrtas qualques oras mai d'ora. La produccion de la consòla es arrestada lo 30 de novembre de 2012 e Sony anóncia cessar tota distribucion sul territòri japonés a comptar del 28 de decembre de 2012.[3] Lo 7 de genièr de 2013 la produccion e la distribucion de la PS2 es arrestada dins la rèsta del mond.
En agost de 2018, Sony anóncia per son sit oficial, la barradura al 7 de setembre del servici après-venda, lo darrièr encara actiu. Atal, Sony clau definitivament l'èra de la PlayStation 2.
Acessòris
modificar
La maneta de jòc oficiala, la DualShock 2, repren l'aparéncia globala de la DualShock. Los botons son d'ara enlà analogics (levat L3, R3 e Analog) e la maneta produtz dos nivèls de vibracions suplementàrias. Acompanhada d'aquesta, la carta memòria Memory Card (8 MB), qu'intègra la tecnologia MagicGate, es venduda separadament. D'autres accessòris son prepausats: una telecomanda, una adaptadoira ret, un disc dur, lo micro-casco HeadSet, los micros SingStar, las guitarras Guitar Hero, dels volants a retorn per fòrça, lo pistolet optic GunCon 2, lo clavièr-controlaire NetPlay Controller, lo multiplicateur de maneta Multitap, dels cables (AV analogica, S-Video, i.Link), lo prèst-a-montar Linux, o encara dels sòcles (orizontal e vertical).
L'EyeToy es una pichona camera desvolopada per Sony que se connècta al pòrt USB de la consòla e permet d'interagir amb l'univèrs de jòc en realizant de movements amb lo còs. Lançat en Euròpa lo 9 de julhet de 2003 en paquet amb lo jòc EyeToy: Play, l'accessòri coneis una certana capitada e tot una gamma de jòcs especialament concebuts pel periferic a espelit. La camera pòt tanben èsser utilizada coma webcam sus un ordenador gràcias a sa connectica USB e los pilòts apropriats. Sony a egalament comercializat de buzzers dins l'encastre de la seria Buzz!. Venduts per quatre, son provesits de cinc botons, dont quatre de colors, que permeton d'interagir amb los jòcs coma dins un jòc televisat.