Pavlos Fyssas

Pavlos Fyssas (en grèc: Παύλος Φύσσας), mai conegut artisticament coma Killah P (Atenas, 10 d'abril de 1979 - Keratsini, Lo Pirèu 18 de setembre de 2013) foguèt un cantaire de rap grèc.

Aprèp d'aver arrestat los estudis, en 1998, s'èra avodat a la musica e s'èra bastit cèrta reputacion coma musician de hip-hop e tanben coma militant d'esquèrra antifascista. Aviá collaborat pontualament amb lo grop Imiskoumbria.

Lo 18 de setembre de 2013, just aprèp mièjanuèch, Pavlos, militant notòriament opausat a las ideologias fascistas, foguèt agarrit davant una cafetariá de la carrièra Panagi Tsaldari per un nombre important de militants del partit xenofòb Alba Daurada mentre que sortissiá amb un grop d'amics. La polícia grèga, presenta al moment dels faches, volguèt pas intervenir. En ensajar de protegir sos collègas e son amiga Fyssas recebèt dos cops de cotèl al pitre e un a l'esofag. Se moriguèt puèi a l'espital, aperaquí 20 minutas aprèp son agression lo meteis jorn.

Son agressor e assassin, un militant d'Alba Daurada de 45 ans, Giorgios Roupakias, foguèt arrestat qualque temps aprèp l'agression, aparentament per una policièra sola e contra lo vejaire de sos collègas que volián pas intervenir alara.