Patrick Hernandez

Patrick Hernandez es un cantaire francés, d'origina espanhòla per son paire e italiana per sa maire, nascut còsta París lo 6 d'abril de 1949 al Blanc-Mesnil (França).

A conegut una capitada mondiala ambe un títol disco cantat en anglés, Born to Be Alive, enòrme tube en 1979.

Après aver passat son enfança entre Anjau e la region parisenca, cap a sos 19 ans, partís viure en Occitània, dins lo Lemosin, ont jòga coma musician dins los bals a Peirigús e a Limòtges ; enregistra quitament ambe son grop de l'epòca a Brussèlas (Belgica) en 1975 un album de catòrze cançons contenent ja una version ròck de Born to Be Alive. Aquel album a pas cap de capitada, e lo grop de Patrick Hernandez se separa de caps 1978. Demorant totjorn dins Peirigòrd, ven alavetz elevaire de vedèls.

Per astre, un jorn lo productor musical Jean Vanloo, esponsorizat per Marcel De Keukeleire, director de las Edicions Elver, li demanda de lo rejónher a Mouscron, en Belgica, per trabalhar amassa. Enregistra alavetz tornarmai a l'estúdio D.E.S, dins un adobament de Guy Delo, supervisat per Jack Say (lo proprietari de l'estúdio), una version novèla de son títol Born to Be Alive, aqueste còp dins un estili disco. Aquela version comença d'obtenir una gròssa capitada tre 1978 en Itàlia. Born to Be Alive es alavetz publicat en França en 1979, ont ven un tube, e dintra quitament dins los palmareses al Reialme Unit e als Estats Units, venent aital una capitada mondiala del disco.

Per l'anecdòta, al moment de causir de dançairas per promòure sa cançon sus scèna, Patrick Hernandez audiciona entre autres a París una jova americana, mas que serà pas interessada fin finala per participar a l'espectacle, avent agut d'autras proposicions mai interessantas coma vedeta principala. Aquela dançaira, Madonna Louise Ciccone, vendrà fòrça celèbra coma cantaira pop dins las annadas 1980 jol nom de scèna de Madonna (son prenom vertadièr).