Partit unic
Un partit unic es un partit politic que tèn legalament, e de còps constitucionalament, lo monopòli de l'activitat politica au sen d'un Estat. Aquò mena a la concentracion dau poder entre lei mans dei caps dau partit e limita fòrça lei mejans d'expression deis oposicions politicas. De mai, en certanei cas, lo partit unic pòu formar una autoritat reconeguda au sen de l'Estat e assegurar de foncions estatalas (« partit-Estat »). Per aquelei rasons, lei regims de partit unic son generalament considerats coma dictaroriaus. Lo tèrme de partit unic es tanben utilizat per designar la situacion d'Estats ont un partit especific assegura, per la lèi ò la constitucion, un ròtle predominant dins lo foncionament deis institucions. Aqueu sistèma empacha pas l'existéncia de partits segondaris que son generalament subordinats au partit principau au sen d'una coalicion oficiala.
Lei regims politics de partit unic foguèron frequents en Africa après la fin de la colonizacion e dins lo blòt sovietic durant la Guèrra Freja. L'objectiu èra d'assegurar l'unitat nacionala per permetre lo desvolopament dau país ò l'avançada de la Revolucion. Dins lei fahcs, aquò menèt sovent a una repression de l'oposicion.
D'un biais pejoratiu, l'expression « partit unic » pòu èsser utilizada per designar un partit dominant la vida politica d'un Estat durant un periòde lòng. Per exemple, foguèt lo cas dau Partit Revolucionari Institucionau que dirigiguèt Mexic de 1929 a 2000[1]. De mai, lo multipartisme es pas una condicion d'existéncia d'un regim democratic car existís de regims dictatoriaus que tolèran l'existéncia de partits d'oposicion dins lo quadre d'una « democracia de façada ».