Pacte Germanosovietic

Lo Pacte Germanosovietic (ò Pacte Molotov-Ribbentrop) es un tractat de non agression signat lo 23 d'aost de 1939 entre l'URSS e Alemanha. D'efiech, inquiet dei reticéncias francobritanicas a prepaus d'una intervencion còntra Alemanha, Estalin decidèt de melhorar sei relacions amb Alemanha a partir d'abriu de 1939. Per Alemanha, aquò èra l'ocasion de menar sei projèctes expansionistas en Euròpa Orientala sensa rescontrar d'oposicion armada vertadiera. D'efiech, de discussions secrètas menèron a la definicion de zònas d'influéncia sovietica e alemanda : Finlàndia, Estònia, Letònia e Polonha Orientala per Moscòu e Lituània e Polonha Occidentala per Berlin.

Reparticion prevista e efectiva dei territòris d'Euròpa Orientala partejat entre Alemanha e URSS per lo Pacte Germanosovietic.

Aquel acòrdi precipitèt l'entraïnament de la Segonda Guèrra Mondiala en Euròpa quand Polonha, sostenguda per França e lo Reiaume Unit, refusèt de cedir ais exigéncias alemandas regardant la vila de Danzig. De son caire, en 1939-1940, lei Sovietics aprofichèron aqueu conflicte per annexar lei regions balticas e per atacar Finlàndia per annexar divèrsei territòris dins la region de Leningrad. Dins aquò, aqueu tractat èra considerat coma provisòri per leis Alemands car Adolf Hitler aviá d'ambicions territòrialas pus importantas a l'èst. Rompèt donc l'acòrdi en junh de 1941 per atacar dirèctament l'Union Sovietica.

Liames intèrnes

• Guèrra d'Ivèrn.
• Segonda Guèrra Mondiala.