Oppidum d'Ausseruna

L'oppidum d'Ausseruna es un site arqueologic comprenent los vestigis d'un vilatge antic, situat sus un puèg de la comuna de Nissa d'Ausseruna, dins lo departament d'Erau en Occitània. Lo vilatge foguèt ocupat entre lo sègle VIen an. J.-C. (edat del fèrre) e lo sègle Ièr apr. J.-C. Sa posicion al suquet li val d'èsser qualificat d'oppidum.

Localizacion e environament

Lo puèg d'Ausseruna domina d'una centena de mètres las planas a l'entorn e ofrís aital una excellenta vista panoramica sus un partida de la region de Besièrs e de Narbona, fins als Pirenèus. Entre autres, lo punt de vista permet de veire l'estanh de Montadin, situat al nòrd, al pè d'Ausseruna. Dempuèi la fin del sègle XVII, lo canal del Miègjorn passa al sud del puèg en venent del tunèl de Malpàs al sud-èst.

Lo luòc se situa a aperaquí uèit quilomètres a l'oèst e a vòl d'aucèl del centre istoric de Besièrs. Lo site arqueologic se tròba a aperaquí dos quilomètres e mièja al nòrd del vilatge vièlh de Nissa d'Ausseruna, al limit amb los territòris de Colombièrs, Montadin e Pòlhas que ne posedisson una part dels travèrs.